Բեռլինում Ադրբեջանի դեսպանատան պարիսպները մի քանի օր է պատված են հակահայկական քարոզչություն պարունակող պաստառներով:
Դրանց վրա, մասնավորապես, գրված է՝ «Հայաստանն ահաբեկչական պետություն է», «Դադարեցրե՛ք Հայաստանի հարձակումը Ադրբեջանի վրա», «Հայաստանը ոչ թե պատերազմի, այլ խաղաղության պետք է պատրաստվի» և այլն:
Իրավապաշտպան Իլիաս Հացպանյանը Twitter-ի իր միկրոբլոգում գրել է.
“Չնայած այն բանին, որ Բեռլինում Ադրբեջանի դեսպանատունը լի է Հայաստանի դեմ ատելության խոսք տարածող պաստառներով, Գերմանիայի նախագահը հավատարմագրել է Աղաևին որպես Ադրբեջանի դեսպան, ինչպես և նախատեսված էր։ Ահա թե ինչպես է հանդուրժվում հայերի նկատմամբ ատելության խոսքը բարձրագույն իշխանության կողմից”։
MediaHub-ը դիմել է ՀՀ ԱԳՆ՝ հասկանալու, թե հայկական կողմն ինչ է պատրաստվում անել ի պատասխան այս կարգի հակահայկական քարոզչության:
