Թուրքիան մտադիր է երկարաձգել Ռուսաստանի, Ադրբեջանի և Իրանի հետ բնական գազի գնման մասին համաձայնագրերը։ Այս մասին հայտնել է երկրի էներգետիկայի նախարար Ֆաթիհ Դոնմեզը։
«Մեր հիմնական մատակարարներն են Ռուսաստանը, Ադրբեջանն ու Իրանը։ Մենք մտադիր ենք նոր ժամկետով երկարաձգել նրանց հետ պայմանագրերը։ Մենք ձգտում ենք բավարարել էներգակիրների մեր պահանջները»,- ասել է նա Haber Global հեռուստաալիքի եթերում։
Գազային ոլորտում համագործակցության հարցերը ՌԴ և Թուրքիայի նախագահներ Վլադիմիր Պուտինը և Ռեջեփ Էրդողանը քննարկել են հուլիսի 19-ին Թեհրանում կայացած բանակցություններում:
Այս ոլորտում փոխգործակցությունը երկու երկրների միջև առևտրատնտեսական համագործակցության հիմնական ուղղություններից է։ Ներկայումս Ռուսաստանը և Թուրքիան ուղղակիորեն կապված են «Երկնագույն հոսք» և «Թուրքական հոսք» գազատարներով։ 2021 թվականի վերջին «Կապույտ հոսքով» հանրապետություն է մատակարարվել 15,98 միլիարդ խորանարդ մետր գազ, ինչը առավելագույն ցուցանիշն էր գազատարի շահագործման մեկնարկից ի վեր։ Ընթացիկ տարվա առաջին վեց ամսում Ռուսաստանի Դաշնությունը Թուրքիային մատակարարել է գրեթե 13 միլիարդ խորանարդ մետր գազ։