Բրիտանիայի ընդդիմությունը քվեարկություն է անցկացրել Բորիս Ջոնսոնի կառավարությանն անվստահություն հայտնելու հարցով, սակայն չի հաջողվել հասնել արտահերթ ընտրությունների, հաղորդում է ТАСС գործակալությունը։ Բրիտանական խորհրդարանի պատգամավորների մեծամասնությունը` 349 հոգի, վստահություն է հայտնել պահպանողականների կառավարությանը։ Նրանց անվստահություն է հայտնել 238 պատգամավոր։. փոխանցում է DW.com-ը:
Լեյբորիստական կուսակցությունը, մյուս ընդդիմադիր ուժերի հետ պնդում էր, որ Բորիս Ջոնսոնի հրաժարականին հանգեցրած սկանդալներից հետո պահպանողական կուսակցությունն այլևս չի կարող ղեկավարել երկիրը, իսկ Ջոնսոնը պետք է անհապաղ հեռանա պաշտոնից։
Կառավարությանն անվստահության քվե հայտնելու համար հարկավոր է ձայների պարզ մեծամասնություն։ Ընդդիմությունը նպատակին հասնելու քիչ շանսեր ուներ, քանի որ 650-տեղանոց Համայնքների պալատում 358 մանդատ պատկանում է պահպանողականներին։
Ջոնսոնը վարչապետի պաշտոնը կզբաղեցնի, մինչև իրեն փոխարինող գտնվի։ Այժմ պահպանողական կուսակցությունը նոր ղեկավար է ընտրում։ Ջոնսոնին փոխարինող թեկնածուների շարքում առաջին տեղը զբաղեցնում է ֆինանսների նախկին նախարար Ռիշի Սունակը, երկրորդ տեղում է Միջազգային առևտրի փոխնախարար Փենի Մորդոնտը, որին հաջորդում է արտգործնախարար Լիզ Թրասը։