Որևէ փոփոխություն չկա, նույն իրավիճակն է. ինչ-որ բան են ուզում անել, բայց չգիտեմ, թե իշխանություններն ինչ են պլանավորել: Այս մասին MediaHub-ի հետ զրույցում ասաց Արցախի Հանրապետության Ազգային ժողովի պատգամավոր Մետաքսե Հակոբյանը՝ նշելով, որ Արցախը Հայաստանին կապող ճանապարհը շարունակում է փակ մնալ:

Հարցին, թե արդյոք ԱԺ պատգամավորներին թույլ տվեցին մոտենալ փակ հատվածին, մեր զրուցակիցը արձագանքեց՝ ոչ:

«Մեր խմբակցության ղեկավարը գնացել էր, որպեսզի լինի մեր այն հայրենակիցների հետ, որոնք մնացել են ճանապարհին, բայց թույլ չեն տվել: Չեն թողնում ընդհանրապես որևէ ուղղություներով մոտենալ»,- ասաց նա:

Մետաքսե Հակոբյանից նաև հետաքրքրվեցինք, թե արդյոք հնարավոր է եղել դուրս բերել մեկ տասնյակից ավելի այն ավտոմեքենաները, որոնք ճանապարհը փակվելու հետևանքով, այսպես ասած, գերի էին մնացել.

«Ստեփանակերտից գնացող ավտոմեքենաներին հետ են ուղարկել, բայց Հայաստանից Արցախ եկող ավտոմեքենաների մասով այս պահին որևէ տեղեկատվություն չունեմ»,- ասաց պատգամավորը:

Ավելի վաղ Արցախի տեղեկատվական շտաբից հայտնել էին, որ քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ, այսօր առավոտյան ժամը 10:30-ի հատվածում փակել են Ստեփանակերտ-Գորիս մայրուղին: Ավելի ուշ նրանք վրաններ էին տեղադրել այդ հատվածում:

Ժամը 14։00-ի դրությամբ Լիսագոր-Շուշի և Ստեփանակերտ-Շուշի ավտոճանապարհին հարյուրավոր քաղաքացիներ մնացել են ճանապարհին, որը փակ է առավոտյան ժամը 10։30-ից։