Արդեն երկու շաբաթ է՝ Գառնու «Քարերի սիմֆոնիա» այցելությունը  վճարովի է։ Այդ մասին սոցցանցում ահազանգել էր քաղաքացիներից մեկը եւ հետաքրքրվել, թե մուտքավճարն ինչի հիման վրա է դարձել վճարովի․ «Սա ո՞ւմ որոշումն է։ Դա՞ է այնտեղ կրպակ տեղադրելու պատճառը։ Որքա՞ն է իրական գումարը, ինչի՞ համար։ Ու ինչի՞ են լռել տուրիստականները»։ 

«Պատմամշակութային արգելոց-թանգարանների եւ պատմական միջավայրի պահպանության ծառայություն» ՊՈԱԿ-ի տնօրենի պարտականությունները կատարող Արմեն Հովհաննիսյանը մեզ հետ զրույցում նշեց, որ «Քարերի սիմֆոնիան» իրենց ենթակայության տակ չէ, եւ տեղյակ չէ՝ ով եւ ինչու է մուտքավճար սահմանել։

Կապ հաստատեցինք Գառնու համայնքապետարանի հետ, որտեղից մեզ ասացին, որ համայնքապետարանի ավագանին է նման որոշում ընդունել` «Քարերի սիմֆոնիա» այցելությունները դարձնելով վճարովի եւ դրա դիմաց 200 դրամ գին սահմանելով։ Ընդ որում՝ 200 դրամը վերաբերում է 15 տարեկանից բարձր այցելուներին, իսկ մինչեւ 15 տարեկանների համար մուտքն անվճար է։  
Այդուհանդերձ, ինչո՞վ է պայմանավորված նման որոշման ընդունումը։ ««Քարերի սիմֆոնիայի» տարածքը քանի որ չէր հսկվում, այդ պատճառով շատ այցելուներ գալիս էին ու խնջույքներ էին կազմակերպում, նաեւ աղտոտվածությունն էր շատ մեծ։ Համայնքն էլ չուներ բավարար միջոցներ՝ անվտանգությունն ապահովելու եւ այնտեղից աղբը հանելու համար։ Դրա համար համայնքապետարանը որոշեց «Քարերի սիմֆոնիան» ապահովել անվտանգությամբ եւ այդ վճարն էլ ուղղել անվտանգությանն ու աղբահանության աշխատանքներին»,- նշեցին համայնքապետարանից՝ հերքելով «Քարերի սիմֆոնիայի» տարածքում կրպակ տեղադրելու մասին լուրերը։