Սերբիայի նախագահ Ալեքսանդր Վուչիչը շաբաթ օրը վարչապետի պաշտոնում եւս մեկ ժամկետով առաջադրել է Անա Բռնաբիչի թեկնածությունը, հայտնում է Reuters-ը։
Առաջադրումը տեղի է ունեցել ավելի քան հինգ ամիս անց այն բանից հետո, երբ իշխող Սերբիայի առաջադիմական կուսակցությունը հավաքելց ամենաշատ ձայները համապետական ընտրություններում: Արդյունքների պաշտոնական հրապարակումը հետաձգվել է մեկ ընտրատեղամասում քվեարկության խախտումների պատճառով, ինչը խանգարել է խորհրդարանի գումարմանը։
Վուչիչը, ով ղեկավարում է կուսակցությունը եւ զգալի ազդեցություն ունի կառավարության քաղաքականության վրա, ասել է, որ «անսահմանափակ վստահություն» ունի 46-ամյա Բռնաբիչի նկատմամբ, ով 2020-ին Սերբիայի առաջին կին վարչապետը դարձավ։
Նա նաեւ ասել է, որ 2024-ին՝ նոր կառավարության ժամկետի ավարտից երկու տարի առաջ, դրան լուրջ վերակառուցում է սպասվում, սակայն մանրամասներ չի հայտնել։
«Կարեւոր է, որպեսզի նա վարչապետ մնա, որպեսզի մենք կարողանանք շարունակել քրտնաջան աշխատել եւ լուծել խնդիրներն աշնանը եւ ձմռանը», - ասել է Վուչիչը լրագրողներին:
Իշխող կուսակցությունն 120 տեղ ունի 250 տեղանոց խորհրդարանում, եւ կառավարություն ձեւավորելու համար պետք է գործընկերներ փնտրի։ Սերբիայի առաջադիմական կուսակցության ավանդական գործընկերներ սոցիալիստները եւ Վոյեվոդինայի հունգարացիների ցուցակը ունեն համապատասխանաբար 31 եւ հինգ պատգամավոր։
Ակնկալվում է, որ Բռնաբիչն առաջիկա շաբաթներին խորհրդարանին կներկայացնի կառավարության նոր կաբինետը եւ քաղաքական ծրագիրը: Հ
Համաշխարհային ասպարեզում նրա գլխավոր խնդիրներից մեկը կլինի Սերբիայի՝ Եվրամիությանը միանալու ցանկության եւ Ռուսաստանի ու Չինաստանի հետ կապերի պահպանմանն ուղղված ճնշման հավասարակշռումը։