Եթե կոնկրետ բնակավայրեր նշենք, գուցե սխալվենք։ Այդ մասին այսօր խորհրդարանում լրագրողների հետ զրույցում ասաց ՏԿԵ նախարար Գնել Սանոսյանը՝ անդրադառնալով հարցին, թե թշնամին սեպտեմբերյան մարտերից հետո կոնկրետ ո՞ր ուղղություններով է առաջխաղացում ունեցել ու ներխուժել ՀՀ սուվերեն տարածք։
Նրա խոսքով՝ հիմնականում դա տեղի է ունեցել Գեղարքունիքի, Վայոց ձորի ու Ներքին Հանդի ուղղությամբ, բայց թե կոնկրետ որտեղ, ինչքան՝ դժվար է նշել։
Ինչ վերաբերում է խաղաղության պայմանագրին, ապա Սանոսյանը նշեց, որ այն ենթադրում է մեր սուվերեն տարածքի վերականգնում։ «Այսինքն՝ պահանջ կա, որ թշնամին պետք է դուրս գա մեր սուվերեն տարածքից»,- ասաց նա։
Անդրադառնալով Հյուսիս-Հարավի վերականգնմանն ու թունելի կառուցմանը, Սանոսյանը նշեց, որ իրանական կողմից կֆինանսավորվի Քաջարանի թունելի հատվածը, իսկ մյուս երկու ճանապարհները կֆինանսավորվեն գործընկեր կազմակերպությունների կողմից։
«Գործընթացը սպասվածից երկար է տևում, քանի որ շատ ընկերություններ են դիմել ու փաթեթները ուսումնասիրել էր պետք։ Քաջարան-Ագարակ մրցույթը մոտ օրերս ենք հայտարարել, իսկ թունելի մասով որևէ բանկի հետ վերջնական տարբերակի չենք եկել, քանի որ ունենք ցանկություն իրանական գործընկերների հետ աշխատելու, օրինակ՝ իրանական բանկով իրանական ընկերությունների հետ։ Այդ ընկերությունները կարողություններ ունեն, տեսել եմ ես, թե իրենք ինչ կամուրջներ ու թունելներ կարող են կառուցել»,- ասաց նա։