Այսօր բոլորս հավաքվել ենք մի տեղ համպատրաստից, ուղղակի հասկանալով, որ իրականում մեր երկրում ստեղծվել է մի իրավիճակ, երբ յուրաքանչյուրիցս է կախված մեր երկրի ապագան։ Այս մասին «Ազատության» հրապարակից հայտարարեց «Հայրենիք» կուսակցության ղեկավար Արթուր Վանեցյանը։ «Սրանք ուղղակի բառեր չեն, սա իրականում մի իրավիճակ է, որը պարզ է գրեթե բոլորին։ Այսօրվա մարդկանց հոսքը և իշխանությունների կողմից այսքան մեծ քանակությամբ ուժեր կուտակելը խոսում է այն մասին, որ մենք ճիշտ ուղղու վրա ենք։ Հիմա խնդրում եմ բոլորիդ, որպեսզի մեր ուժերը պահենք վաղվա և մյուս օրերի համար։ Մենք մնալու ենք այստեղ մինչև մեր պայքարի ավարտը»,- հավելեց Արթուր Վանեցյանը։ Հիշեցնենք, որ ապրիլի 17-ի ժամը 14:00-ից սկսած «Հայրենիք» կուսակցության ղեկավար Արթուր Վանեցյանի նախաձեռնությամբ կազմակերպվել էր հավաք՝ հանուն Արցախի և Հայաստանի փրկության։ Այսօր ամփոփեցին հավաքի առաջին օրը, վաղը կրկին «Ազատության» հրապարակից կշարունակեն հավաքը։