«Ժողովուրդ» օրաթերթը գրում է.
«Ժողովուրդ» օրաթերթի լավատեղյակ աղբյուրները փոխանցում են, որ հայրենի իրավապահ համակարգը, ԱԺ ՔՊ խմբակցության մի խումբ պատգամավորներ, ԿԸՀ նախագահը, դատախազության եւ քննչական մարմինների անդամները շաբաթ եւ կիրակի թեժ քննարկումներ են ունեցել Ծաղկաձորում:
Բանն այն է, որ հայրենի իշխանության ներկայացուցիչները, Քրեադատավարական օրենսգրքի հետ առնչվելով, մշտապես խնդիրների են բախվում: Դրանք վերաբերում են ձերբակալությունների ժամկետներին, դատարանների աշխատանքներին, դատական համակարգի ծանրաբեռնվածությանը: Իրավական համակարգը այս հարցերում մշտապես թեժ կռիվների մեջ է, որոնք ներքին բախումներ են ու երբեմն վերածվում են հանրային քննարկման:
Իրավական համակարգը որոշել է հավաքվել, միմյանց լսել: Նշենք, որ ծաղկաձորյան հավաքը ղեկավարել է ԱԺ պետական- իրավական հարցերի մշտական հանձնաժողովի նախագահ Վլադիմիր Վարդանյանը, որին, ըստ մեր աղբյուրների, մերթ ընդ մերթ «օգնել է» ԿԸՀ նախագահ Վահագն Հովակիմյանը, որը թեեւ ԿԸՀ նախագահն է՝ անկախ մարմնի ղեկավար, բայց երբեմն ԱԺ պատգամավորի նախկին աշխատանքն է անում:
Ներկաները թեժ քննարկել են նաեւ Հովակիմյանի՝ այդ հավաքին ներկա գտնվելու փաստը, քանի որ անհասկանալի է եղել բոլորի համար, թե անկախ համակարգի ղեկավարն ինչ գործ ունի նման հավաքներին:
Հավելենք, որ Ծաղկաձոր են մեկնել նաեւ ՔՊ վերնախավի «սրտի» պատգամավորներ Արփի Դավոյանը, Լիլի Մինասյանը, Արմեն Խաչատրյանը, Ալխաս Ղազարյանը, ինչպես նաեւ Նիկոլ Փաշինյանի խորհրդական, գյումրեցի Նազելի Բաղդասարյանը:
Իշխանության ներկայացուցիչները, կարելի է ասել, ժամանակ են անցկացրել, իսկ իրավապահ համակարգը թեժ քննարկել է իր ներքին խոհանոցը: Ըստ մեր աղբյուրների՝ համակարգում լուրջ դժգոհություններ կան, եւ որոշվել է առաջիկայում կրկին հանդիպել նույն ֆորմատով:
«Հրապարակ» թերթը գրում է.
«Մեր տեղեկություններով՝ ԱԺ պաշտպանության հանձնաժողովի փորձագետ, ՊՆ տխրահռչակ նախկին խոսնակ Արծրուն Հովհաննիսյանն ու ՔՊ-ական պատգամավոր, նույն հանձնաժողովի անդամ Վիլեն Գաբրիելյանն առաջիկա օրերին կգործուղվեն Ֆինլանդիա:
Թե ինչ առաքելությամբ է 44-օրյա պատերազմի ժամանակ 44 օր հանրությանը խաբած, պատերազմական ինֆորմացիաները կեղծած Արծրուն Հովհաննիսյանը բյուջեի հաշվին գործուղման մեկնելու, երբ շատ ավելի ճիշտ կլիներ, որ գտնվեր բոլորովին այլ «վայրում», մեզ հայտնի չէ: Մեր աղբյուրը նշեց՝ մասնագիտական քննարկման են մասնակցելու: ԱԺ-ից հաստատեցին այս գործուղման մասին լուրը»:
«Փաստ» օրաթերթը գրում է
Ամիսներ առաջ մենք տեղեկացրել էինք, որ ՀՀ երկրորդ նախագահի գրասենյակի՝ արդեն նախկին ղեկավար Վիկտոր Սողոմոնյանը պատրաստվում է նոր մեդիա ռեսուրս ստեղծել: Մեզ տված հարցազրույցում Սողոմոնյանը հաստատել էր տեղեկությունը՝ խոստանալով, որ այն շուտով կգործարկվի։ Եվ ահա, ինչպես մայիսի 9-ին պարզվեց, խոսքը alphanews.am համահայկական կայքի մասին է։ Փաստացի, հայկական լրատվամիջոցներին ավելացավ ևս մեկը, սակայն գոնե առաջին օրերի նույնիսկ թռուցիկ ուսումնասիրությունը ցույց է տալիս, որ այս պարագայում, կարծես, թե՛ ուղղվածությունը, թե՛ կոնտենտը բոլորովին տարբերվող են։
Կայքի հիմնադիր, քաղաքագիտության դոկտոր Վիկտոր Սողոմոնյանը լրատվամիջոցի մեկնարկային հարցազրույցում ասել է, որ «Ալֆանյուզը» խնդիր է դրել ներկայանալ միայն հայությանն առնչվող լրատվությամբ՝ սակայն ընդգրկելով ոչ միայն Հայաստանն ու Արցախը, այլև լայնորեն ներկայացնել Սփյուռքի մեր հայրենակիցների կյանքը և մոտեցումները։ Սողոմոնյանը նաև հայտարարել է, որ նախատեսում են կազմակերպել մասնագիտական բաց քննարկումներ, հանրայնացնել հայ ժողովրդի պատմության նշանակալի էջերը, դերը համաշխարհային պատմության մեջ և այլն։ Լրատվամիջոցի «թիրախը», կարծես, ակնհայտ, բայց և գործնականում չյուրացրած լսարանն է, քանի որ ազգությամբ հայերի թիվը ընդունված է համարել 10 մլնից ավելի, սակայն հայաստանյան լրատվադաշտից հաճախ ինչ-որ առումով դուրս է մնում սփյուռքահայությունը։
Այս առումով զգալի բաց կա նաև այն տեսակետից, որ շատ քիչ է հնչում Սփյուռքի մեր հայրենակիցների կարծիքը այս կամ այն թեմայի վերաբերյալ, բացառությամբ երևի թե դաշնակցական գործիչների հրապարակումների։Եվ, ըստ էության, եթե Սողոմոնյանին և գործընկերներին հաջողվի լիարժեք կյանքի կոչել Հայկական Սփյուռքը, Հայաստանն ու Արցախը կապի մեջ պահող նման նախաձեռնությունը, բավականին լուրջ դերակատարում կարող է ստանալ, և ոչ միայն լրատվադաշտում։ Հավելենք, որ, մեր դիտարկմամբ, անցած մեկ շաբաթվա ընթացքում լրատվամիջոցն արդեն երկու ուղիղ տեսակամուրջ է իրականացրել Երևանի, Մոսկվայի և Լոս Անջելեսի իր տաղավարներից՝ ունենալով ուշագրավ հյուրեր, ռեպորտաժներ, հարցախույզեր Հայաստանում և Սփյուռքում։ Իսկ լրահոսին հետևելով՝ հասկանում ենք, որ մեր գործընկերները սկզբունք են որդեգրել ներկայացնել հայերիս առնչվող բազմատեսակ տեղեկատվությունը՝ ատելության խոսքից ու ասեկոսեներից զերծ, որը այսօր չափազանց կարևոր ու գոնե մեզ համար շատ հոգեհարազատ գործելաոճ է։
Նկատելի է նաև, որ ներքին քաղաքական իրավիճակների լուսաբանման վրա կենտրոնացվածություն չկա, սակայն կարծում ենք, ի վերջո, անհնար կլինի խուսափել դրանից։ Ի մասնավորի, հատկապես 44-օրյա պատերազմից հետո Սփյուռքի քաղաքական թե՛ նշանակությունը, թե՛ դիրքն ու հեղինակությունը փոխվել են, միաժամանակ սփյուռքի գործիչների հետ կապված «սև ցուցակներով», բաժանումներով, փորձ է արվել պառակտել նաև մեր դրսի հայրենակիցներին, իսկ դրանք, ուզենք թե չուզենք, ներքաղաքական գնահատականների են արժանանալու։ Երևի թե այս առումով ևս կարևոր է նրանց լսարանի տրամադրումը։ Դե, ինչպես երևում է, նպատակները մեծ են, մնում է՝ մեր գործընկերներին մաղթել հաջողություն այդ կարևոր առաքելության մեջ։
«Հրապարակ» թերթը գրում է.
«Բրյուսելի արդյունքները ՔՊ խմբակցությունում ցնծությամբ են ընդունել, նրանք գրեթե անհավանական ձեռքբերում են համարել այն, որ Ադրբեջանը ճանաչել է Հայաստանի տարածքային ամբողջականությունը՝ 1991թ. Ալմա-Աթայի հռչակագրի հիման վրա եւ 29.8 հազար քառ. կմ-ում։
Մի բան, որ, ՔՊ-ական մեր աղբյուրի խոսքով, տեւական ժամանակ դրված էր սեղանին, եւ Ալիեւը դիմադրում էր։ Բրյուսելյան հանդիպման այլ մանրամասներ ՔՊ-ականները չգիտեն, սպասում են Փաշինյանի վերադարձին եւ նրա հետ հանդիպմանը, որ հասկանան՝ ինչպես եւ ինչի դիմաց Ադրբեջանին հնարավոր եղավ համոզել»:
«Իրավունք» թերթը գրում է.
««Իրավունքի» հետ զրույցում «Հանուն ժողովրդի բարեկեցության մարդասիրական եւ տնտեսական զարգացման» ՀԿ նախագահ, ազգությամբ եզդի իրավապաշտպան Այսեր Իսայանն ասաց, որ «Ես Արցախի հարցի պահանջատերն եմ» եւ «Արցախցին երբեք յաթաղանահպատակ չի եղել ու չի լինի» կարգախոսներով` մայիսի18-ից, ժամը` 12:00-ից Երեւանի «Օղակաձեւ» զբոսայգում տեղակայված« Նեմեսիս» գործողության հեղինակներին նվիրված հուշակոթողի մոտ անժամկետ նստացույց է սկսելու` ի պաշտպանություն շրջափակման մեջ գտնվողն 120 հազար արցախցիների»:
«Ժողովուրդ» օրաթերթը գրում է.
«Ժողովուրդ» օրաթերթի տեղեկությունների համաձայն՝ 2020 թվականի սեպտեմբերի 27-ին սանձազերծված ռազմական գործողությունների հանգամանքների ուսումնասիրման նպատակով ստեղծված քննիչ հանձնաժողովը սպասում է Արցախի նախկին հրամանատար Ջալալ Հարությունյանի պատասխանին, որպեսզի կարողանա հանձնաժողովի նիստ հրավիրել, լսել նախկին հրամանատար-նախարարին:
Ասել է թե՝ Ջալալ Հարությունյանը խոստացել է հանձնաժողովի նախագահ Անդրանիկ Քոչարյանին ներկայանալ քննիչ հանձնաժողով, բայց օրն ու ժամը պետք է իրեն հարմարեցնեն: Եվ, ահա, մեզ հայտնի է, որ նա ԱԺ կգնա հունիսի սկզբին, ու հանձնաժողովը անհամբեր սպասում է նրա հետ հանդիպմանը։
«Ժողովուրդ» օրաթերթը գրել էր, որ 44-օրյա պատերազմի հանգամանքներն ուսումնասիրող քննիչ հանձնաժողով է հրավիրվելու ՊԲ նախկին հրամանատար Ջալալ Հարությունյանը:
Առաջիկայում այս շարքը շարունակվելու է, եւ նոր հրավիրյալներ էլ կլինեն: Բանն այն է, որ քննիչ հանձնաժողովի գործունեությանը քիչ ժամանակ է մնացել, եւ պետք է նրանք աճապարեն:
Հիշեցնենք, որ միայն ՔՊ-ականներից կազմված այդ հանձնաժողովի գործունեության իրական նպատակը պատերազմի հնարավոր հանգամանքները Նիկոլ Փաշինյանի վրայից մաքրելն է:
«Հրապարակ» թերթը գրում է.
«Արցախի Անվտանգության խորհրդի նախկին քարտուղար Սամվել Բաբայանը նախօրեին կատարյալ ֆիասկո գրանցեց։ Նա ամիսներ շարունակ նախապատրաստվում էր մեծ հանրահավաքի, սակայն Ստեփանակերտի հրապարակում մի քանի հարյուր, լավագույն դեպքում՝ հազար մարդ էր երեկ կարողացել հավաքել։ Չնայած իշխանությունների հասցեին հնչող քննադատությանը եւ կոշտ գործողությունների անցնելու սպառնալիքներին, ակնհայտ է, որ նա չկարողացավ ճնշում գործադրել, հասնել իր նպատակին, այն է՝ նշանակվել պետնախարար: Բայց Արցախի իշխանությունները զիջեցին եւ հայտարարեցին ողջ քաղաքական դաշտի հետ կոնսուլտացիաներ սկսելու մասին։ Որոշ տեղեկություններով, Արցախի իշխանությունների վրա Հայաստանից են ճնշում գործադրել։
Արցախի մեր աղբյուրները մտավախություն ունեն, որ տասնօրյա կոնսուլտացիաներից հետո Բաբայանը կնշանակվի պետնախարար, իսկ ներկայիս պետնախարար Գուրգեն Ներսիսյանը, ով Բաբայանի հետ ազգակցական կապեր ունի, կվերադառնա գլխավոր դատախազի պաշտոնին։ Ի դեպ, դատախազի պաշտոնը մինչ օրս թափուր է։ Ասում են, որ Նիկոլ Փաշինյանը, ով նախօրեին համաձայնություն է տվել Արցախն Ադրբեջանի կազմում ճանաչելուն, Բաբայանի նշանակմամբ փորձելու է կյանքի կոչել Արցախն Ադրբեջանին հանձնելու վերջին արարը։
Արդեն տարբեր սցենարներ են քննարկում, որ, նախ, «պետնախարար Սամվել Բաբայանի պահանջով» ադրբեջանցիները կբացեն անցակետը, որով նրա հեղինակությունը կբարձրանա, բայց շատ մարդ կհեռանա Արցախից։ Հետո նա կպահանջի ռուս խաղաղապահների հեռացումը, քանի որ նրանք չեն ապահովում իրենց անվտանգությունը, ապա Արցախի հանքերի շահագործման թույլտվություն կտա ադրբեջանական ընկերություններին՝ պատճառաբանելով, որ փողը, բոլոր դեպքերում, Արցախի բյուջե է մտելու: Եվ ադրբեջանցիները տանտիրոջ իրավունքով կապրեն Արցախում, ու Արցախը վերջնականապես կհայաթափվի։ Բայց լավատեղյակ աղբյուրն ասաց, որ բացառված է Սամվել Բաբայանի` պետնախարար նշանակվելը: Գոնե այնքան ժամանակ, քանի դեռ նախագահի աթոռին Արայիկ Հարությունյանն է նստած»: