Աշխատանքի և սոցիալական հարցերի նախարարության կողմից արդեն իսկ մշակվել և շրջանառության մեջ է դրվել «Սուրմալու» առևտրի կենտրոնում տեղի ունեցած պայթյունի հետևանքով զոհերի ընտանիքներին և վիրավորում ստացած անձանց սոցիալական աջակցություն տրամադրելու կարգը հաստատելու մասին նախագիծը: MediaHub.am-ի հետ զրույցում նախարարության մամուլի հարցերով պատասխանատու Զառա Մանուչարյանը նշեց, որ այս պահին հստակ թիվ չկա, սակայն շահառուների շրջանակը հստակ է։ 

«Աջակցություն կտրամադրվի զոհերի ընտանիքներին և վիրավորում, խեղում, վնասվածք ստացած այն անձանց, ովքեր հիվանդանոցային պայմաններում բուժում են ստացել։ Այս պահին հստակ թիվ նշել չենք կարող, թիվն ավելի հստակ կլինի Կառավարության նիստի օրակարգում ներառվելու դեպքում, քանի որ ուղակել ենք գործընկեր գերատեսչություններ, հնարավոր է՝ ինչ-որ փոփոխություններ լինեն, դրա համար ավելի ճիշտ է տեղեկատվության այս չափ տրամադրումը։ Չեմ բացառում, որ Կառավարության այս նիստի ընթացքում կլինի»,- ասաց նա։ 

Հիշեցնենք, օգոստոսի 14-ին «Սուրմալու» առևտրի կենտրոնում տեղի է ունեցել պայթյուն՝ հրդեհի բռնկմամբ: Պայթյունի հետևանքով եռահարկ շինությունը մասնակի փլուզվել է։ Ըստ պաշտոնական տվյալների՝ դեպքի հետևանքով 16 քաղաքացի է զոհվել, այդ թվում՝ մանկահասակ երեխա և հղի կին, ևս մեկ քաղաքացի այս պահին համարվում է անհետ կորած։ Տուժել է 60-ից ավելի քաղաքացի:

Լիաննա Թորոսյան