Ադրբեջանի արտգործնախարարությունը հերթական անգամ դատապարտել է Հայաստանի բարձրաստիճան պաշտոնյաների այցը Արցախ: Այս անգամ խոսքը վերաբերվում է ՀՀ Անվտանգության խորհրդի քարտուղար Արմեն Գրիգորյանի երեկ Ստեփանակերտ կատարած այցին: Հայտարարությունում մասնավորապես ասվում է, որ սա «Հայաստանի կողմից հերթական սադրանքն» է և որ այն վտանգում է երկու երկրների միջև հարաբերությունների կարգավորման ջանքերը:
Ըստ հայտարարության՝ «այդ ապօրինի քայլը», որ Հայաստանի պաշտոնատար անձի կողմից ձեռնարկվել է Հայաստանի և Ադրբեջանի ղեկավարների՝ Բրյուսելում կայացած հանդիպումից անմիջապես հետո, «ոչ միայն ստվերում է հանդիպման ընթացքում ձեռք բերված պայմանավորվածությունները, այլև ակնհայտորեն ցույց է տալիս կարգավորման գործընթացում Հայաստանի անկեղծ չլինելը»:
Հիշեցնենք, նախօրեին թշնամի երկրի նախագահը հայտարարել էր, թե Նիկոլ Փաշինյանը համաձայնել է խաղաղության պայմանագրի կնքմանը Ադրբեջանի առաջ քաշած հինգ պահանջների հիմքով, որոնցից մեկը, ըստ Ալիևի, տարածքային ամբողջականության ճանաչումն է։ Բաքուն վաղուց է Ստեփանակերտն ու Արցախը համարում իրենը, ինչին ՀՀ իշխանություններն առանձնապես չեն ընդդիմանում, այդ պատճառով էլ Հայաստանի բարձրաստիճան պաշտոնյաները չեն մեկնում Արցախ։