Դրամի փոխարժեքը՝ այսօր
Եղանակը՝ այսօր
ՀԱՍԱՐԱԿՈՒԹՅՈՒՆ

Սպիտակում ավտոմեքենաների բախումից հրդեհ է բռնկվել, վարորդները հոսպիտալացվել են

Blog Image

Լոռու մարզային փրկարարական վարչության ճգնաժամային կառավարման կենտրոնը hունիսի 3-ին, ժամը 22:07-ին ահազանգ է ստացել, որ Սպիտակ քաղաքի «Վեգա» խանութ-սրահի մոտակայքում ավտոմեքենա է այրվում։

Ինչպես տեղեկացրին ՀՀ ներքին գործերի նախարարության փրկարար ծառայությունից, դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։

Պարզվել է, որ Սպիտակ քաղաքի Սուրեն Ավետիսյան փողոցում՝  «Վեգա» խանութ-սրահի մոտակայքում բախվել են «Mercedes-Benz» (վարորդ՝ Ա. Հ. ծնված 2001 թ․) և «Opel» (վարորդ՝ Ս. Ու. ծնված 1995 թ․) մակնիշների ավտոմեքենաները, ինչի հետևանքով «Mercedes-Benz» մակնիշի ավտոմեքենայում հրդեհ է բռնկվել։

Ըստ աղբյուրի՝ մինչ փրկարարների կանչի վայր հասնելը հրդեհը մարվել է տեղի ուժերով։ Այրվել է շարժիչի հատվածը՝ մասամբ։

Վարորդները հոսպիտալացվել են Սպիտակ քաղաքի բժշկական կենտրոն, որտեղ բժիշկները Ա. Հ.-ի առողջական վիճակը գնահատել են բավարար,  իսկ Ս. Ու.-ինը՝ միջին ծանրության։

Նշվում է, որ փրկարարները հոսանքազրկել են ավտոմեքենաները և փակել «Opel» մակնիշի ավտոմեքենայի գազի բալոնի փականը։

Send