Երեքշաբթի Եվրոպայում գազի գինը գերազանցել է 2200 դոլարը 1000 խորանարդ մետրի դիմաց, վկայում են Լոնդոնի ICE բորսայի տվյալները:
Օրվա սկզբից գազի գինն աճել է 4 տոկոսով։ Անցյալ շաբաթ գազի գինը մարտի սկզբից ի վեր առաջին անգամ հասել էր 2200 դոլարի՝ «Հյուսիսային հոսք»-ով մատակարարումների կրճատման ֆոնին, ապա գերազանցել էր 2300 դոլարը 1000 խմ-ի դիմաց։
Նիդեռլանդների TTF հանգույցում սեպտեմբերյան ֆյուչերսների գինն աճել էր մինչեւ 2207 դոլար 1000 խորանարդ մետրի դիմաց կամ 208.5 եվրո մեկ ՄՎտ/ժ-ի համար (ելնելով եվրո/դոլար ընթացիկ փոխարժեքից՝ ICE-ի գները ներկայացված են եվրոյով մեկ ՄՎտ/ժ-ի համար):
Անցյալ շաբաթ «Հյուսիսային հոսք»-ի միջոցով ռուսական գազի մատակարարումներն ընկել էին մինչեւ առավելագույն հզորության մոտ 20 տոկոսը՝ եւս մի գազատուրբինի աշխատանքի դադարեցման ֆոնին: Ուրբաթ՝ հուլիսի 29-ին, «Գազպրոմ»-ի ղեկավարի տեղակալ Վիտալի Մարկելովը հայտարարել էր, որ Siemens-ը շտկել է խողովակաշարի տուրբինի խափանումների մոտ քառորդ մասը։ Նա ասել է, որ «Գազպրոմ»-ն անհրաժեշտ է համարում ԵՄ-ի եւ Մեծ Բրիտանիայի իշխանություններից պաշտոնական բացատրություններ ստանալ «Հյուսիսային հոսք» գազատարի տուրբինների վերանորոգման եւ սպասարկման թույլատրելիության վերաբերյալ պատժամիջոցների սահմանափակումների տեսանկյունից, ինչպես նաեւ մտավախություն ունի, որ Կանադան կչեղարկի շարժիչների մատակարարման եւ վերանորոգման թույլտվությունները: