Լեհաստանը եւ Չեխիան շաբաթ օրը Սլովակիայի օդային տարածքը պաշտպանելու համաձայնագիր են ստորագրել, քանի որ Սլովակիան հրաժարվում է իր հին խորհրդային «ՄիԳ-29» ինքնաթիռներից, հաղորդում է AP-ն:

Պաշտպանությունը կտեւի այնքան, մինչեւ Սլովակիան ԱՄՆ-ից նոր F-16 ինքնաթիռներ ստանա, ինչը պետք է տեղի ունենա 2024 թվականին։

Սլովակիայի ավիաբազայում համաձայնագիրը ստորագրել են Լեհաստանի, Չեխիայի եւ Սլովակիայի պաշտպանության նախարարներ Մարիուշ Բլաշչակը, Յանա Չեռնոխովան եւ Յարոսլավ Նադը։

Սլովակիան ունի 11 «ՄիԳ-29» կործանիչներ, եւ անցյալ ամիս Նադը հայտարարել է, որ Սլովակիան կարող է դիտարկել դրանք Ուկրաինային որոշակի պայմաններով փոխանցելու հարցը: