Գերմանիայի էկոնոմիկայի նախարար Ռոբերտ Հաբեքը հայտնել է, որ գազապահեստներն ավելի արագ են լցվում, քան նախատեսված էր՝ հույս ներշնչելով, որ Եվրոպայի խոշորագույն տնտեսությունը կարող է այս ձմռանը խուսափել գազի լուրջ պակասից, հաղորդում է Der Spiegel-ը:
«Տանկերը ծրագրվածից ավելի արագ են լցվում», - նշել է Հաբեկը՝ հավելելով, որ կառավարության նպատակը՝ մինչեւ հոկտեմբեր 85 տոկոս պահեստային հզորության հասնելն է, ինչը կարող է իրականացվել արդեն սեպտեմբերի սկզբին։
Գերմանիան գտնվում է արտակարգ իրավիճակների եռափուլ ծրագրի երկրորդ փուլում, որը կազմվել է Ռուսաստանից՝ նրա գլխավոր մատակարարից, գազի մատակարարումների կրճատումից հետո:
Օգոստոսին Գերմանիայի գազի սպառման միայն 9,5 տոկոսն է ստացվել Ռուսաստանից, գրում է Spiegel-ը՝ վկայակոչելով BDEW էներգետիկ արդյունաբերության ասոցիացիայի տվյալները։ Անցյալ տարի ռուսական գազը կազմել է երկրի ընդհանուր սպառման մոտ 55 տոկոսը։
Կառավարությունը նախատեսում էր մինչեւ սեպտեմբերի 1-ը պահեստավորել գազի 75 տոկոսը, սակայն այն արդեն կազմում է 82,2 տոկոս՝ ըստ եվրոպական օպերատոր GIE խմբի արդյունաբերության տվյալները, հաղորդում է Reuters լրատվական գործակալությունը։
«Այնուհետեւ ընկերությունները կկարողանան գազը հանել պահեստից, ինչպես նախատեսված է ձմռանը, որպեսզի մատակարարեն նաեւ արդյունաբերությունն ու տնային տնտեսությունները», - ասել է Հաբեքը:
Ակնկալվում է, որ բնական հեղուկ գազը (LNG) Գերմանիա կմտնի Ֆրանսիայի տարածքով այն բանից հետո, երբ երկու պետությունները, մատակարարումները հեշտացնելու նպատակով, լուծել են կազմակերպչական եւ տեխնիկական խնդիրները, հաղորդում է Spiegel-ը՝ վկայակոչելով էկոնոմիկայի նախարարության հրապարակած փաստաթուղթը։