Նիկոլ Փաշինյանը մայիսի 26-ին՝ Կառավարության հերթական նիստում հայտարարեց, որ Երկիր մոլորակի ուղեծիր է դուրս բերվել Հայաստանի առաջին տիեզերական արբանյակը։ Թե ի՞նչ արբանյակի մասին է խոսքը, ի՞նչ գործառույթներ է այն իրականացնելու, որքա՞ն գումար է ծախսվել այն գործարկելու համար, չհայտարարվեց։

MediaHub.am-ը հարցում էր ուղարկել ԲՏԱ նախարարություն, որպեսզի ստանա արբանյակի մասին ամբողջական տեղեկատվություն։ Մեր հարցերին, թեև նախարարությունը սահմանված ժամկետում պատասխանել է, սակայն, ցավոք, կան հարցեր, որոնք ամբողջական և հասկանալի մեկնաբանություն չեն ստացել։ Այսպես՝ ստորև ներկայացնում ենք մեր հարցերն ու ստացված պատասխանները։

MediaHub. Ի՞նչ տեխնիկական բնութագիր ունի տիեզերական արբանյակը։

ԲՏԱ․ Այս հարցին նպատակահարման չենք գտնում պատասխանել։

MediaHub․ Արդյոք արբանյակի գործարկումը պետբյուջեի միջոցներով է իրականացվել։ Եթե ոչ, ապա ի՞նչ ֆինանսական աղբյուրների հաշվին։

ԲՏԱ․ Ֆինանսավորումը կատարվել է պետական բյուջեից։

MediaHub.am. Համաձայն ՀՀ օրենսդրության՝ տիեզերական գործունեությունն իրականացվում է լիցենզիայի հիման վրա։ Ո՞ր կազմակերպությունն է ստացել այդ լիցենզիան, որքա՞ն ժամանակով, և արդյոք այդ կազմակերպությունը տվյալ ոլորտում գործունեություն իրականացնելու փորձ ունեցե՞լ է։

ԲՏԱ․ ՀՀ ԲՏԱ նախարարի 2021 թվականի հոկտեմբերի 19-ի համար 1070-Ա հրամանով, համաձայն Տիեզերական գործունեության լիցենզավորման կարգն ու պայմանները և լիցենզիայի ձևը հաստատելու մասին ՀՀ Կառավարության որոշման դրույթների, «Գեոկոսմոս» ՓԲԸ-ն ստացել է տիեզերական գործունեությամբ զբաղվելու անժամկետ լիցենզիա։ «Գեոկոսմոս» ՓԲԸ-ն ունի երկրային ընդունիչ կայան և տիեզերալուսանկարների ստացման/մշակման փորձ և գործընկերներ տարբեր երկրներից։

MediaHub. ՀՀ օրենսդրության համաձայն՝ վերոնշյալ ոլորտում վերահսկողությունն իրականացնում է տեսչական մարմինը։ Ո՞ր տեսչական մարմինն է այժմ իրականացնելու վերահսկողությունը, որո՞նք են լինելու վերահսկողության հիմնական ուղղությունները։

ԲՏԱ․ Պետական վերահսկողությունը տիեզերական գործունեության բնագավառում իրականացնում է ՀՀ քաղաքաշինության, տեխնիկական և հրդեհային անվտանգության տեսչական մարմինը։ Այն վերահսկողություն է իրականացնում՝ համաձայն Տիեզերական գործունեության մասին ՀՀ օրենքի և տեսչական մարմնի կանոնադրության, մասնավորապես՝ տիեզերական գործունեության բնագավառում օրենքներով և այլ նորմատիվ իրավական ակտերով սահմանված պահանջների պահպանման նկատմամբ վերահսկողության իրականացում, տիեզերական գործունեության իրականացման լիցենզիայի պարտադիր պայմանների և պահանջների նկատմամբ վերահսկողության իրականացում, օրենքով սահմանված դեպքերում և կարգով ստուգումների իրականացում, տիեզերական գործունեության բնագավառում հայտնաբերված խախտումների վերացման ուղղությամբ պարտադիր կատարման հանձնարարականներ տալը, դրանց իրականացմանը հետևելը, օրենքում սահմանված դեպքերում և կարգով վարչական տույժերի նշանակում և օրենքով սահմանված այլ գործառույթներ։

Նշենք, որ մեզ համար հասկանալի չէ, թե ինչպես է նախարարությունը, առանց հիմնավորման ու բացատրության, մեր հարցերից մեկին պատասխանելը ոչ նպատակահարմար համարում։

Նարե Գևորգյան