Արևմտյան երկրներն ինչ-որ փուլում կհասկանան Ուկրաինային զենքով ապահովելու անարդյունավետությունն ու վտանգը։ Այս մասին հինգշաբթի՝ հուլիսի 21-ին, հայտարարել է ՌԴ ԱԳ նախարար Սերգեյ Լավրովը։
«Մեր արևմտյան հարևանները ինչ-որ փուլում կհասկանան Ուկրաինան ժամանակակից զինատեսակներով զինելու բացարձակ անարդյունավետությունն ու վտանգը»,- ասել է նա Հունգարիայի արտաքին գործերի և արտաքին տնտեսական հարաբերությունների նախարար Պետեր Սիյարտոյի հետ համատեղ մամուլի ասուլիսում։
Բացի դրանից, Լավրովը նաև հավելել է, որ կյանքը կստիպի Եվրամիությանը բաց հայացքով նայել, թե ինչ է կատարվում Ուկրաինայում և առաջնորդվել սեփական շահերով։
Երեկ հաղորդվել էր, որ ԱՄՆ-ն այս շաբաթ Ուկրաինային ռազմական օգնության նոր փաթեթ կհատկացնի, որը կներառի լրացուցիչ HIMARS բազմակի հրթիռային համակարգեր և հրետանային արկեր։
Մեծ Բրիտանիան Ուկրաինային կտրամադրի հրետանի և ավելի քան 1600 հակատանկային զենք։ Բացի դրանից առաջիկա շաբաթների ընթացքում Կիևը հարյուրավոր անօդաչու թռչող սարքեր և հազարից ավելի հրետանային արկեր կստանա Միացյալ Թագավորությունից, հաղորդում է «Իզվեստիա»-ն։ Հատուկ գործողության սկզբից ի վեր բրիտանական օգնության ընդհանուր ծավալն արդեն կազմում է 2,3 միլիարդ ֆունտ ստերլինգ։