ԱՄՆ-ից Քեն Մաուլդինը ատրճանակով կրակել է արջի վրա, որը ներխուժել է իր տուն, – հայտնում է New York Post-ը։

Կոլորադոյի բնակիչ Քեն Մաուլդինին կինը արթնացրել է գիշերը ժամը 02:00-ի սահմաններում: «Երբ ես վեր կացա անկողնուց, Քելլին բղավեց՝ «Տանը արջ կա»: Ես անմիջապես վերցրի ատրճանակը», – ասել է տղամարդը:

Կնոջն արթնացրել է հաչող շունը։ Նա մոտեցել է տան երկրորդ հարկի ննջասենյակի դռանը և տեսել, որ ճաշասենյակում մի մեծ արջ կա։ Մաուլդինը ատրճանակով վազել է դեպի դուռը և կրակել  գազանի վրա, որը զույգից մոտ երեք մետր հեռավորության վրա էր։ «Ես անմիջապես կրակեցի. նա գալիս էր ինձ վրա, իսկ ես շարունակեցի կրակել»,- պատմել է նա:

Տղամարդն ատրճանակի  ողջ պահունակը դատարկել է  արջի վրա, որից հետո գազանն ընկել է աստիճանների վրա և ցած գլորվել։ Զույգը անմիջապես ահազանգել է ոստիկանություն։ Նրանք ժամանել են Բնապահպանության ծառայության աշխատակիցների հետ։ Պաշտոնյաները կենդանուն սատկած են գտել։ Պարզվել է, որ գիշատիչը 180 կիլոգրամանոց արու է եղել: Պարզվել է նաև, որ Մաուլդինները գիշերը չեն փակել մուտքի դուռը, և արջը ներս է մտել՝ պարզապես սեղմելով դռան բռնակը։