«Իրավունք» թերթը գրում է. «Պարզվում է` եկեղեցու դեմ արշավից ոչ թե «զադնի» են դրել իշխանականները, այլ համախոհներ չեն կարողանում գտնել եկեղեցականների շրջանում։
Փաշինյանը հրահանգել է թիմակիցներին մինչեւ իր արձակուրդի ավարտն իր սեղանին կոնկրետ փաստերով համախոհների ցուցակ դնել, որպեսզի մինչեւ Խաչվերաց՝ տարվա վերջին տաղավար տոնը, իրենց առաջ դրված նպատակն ի կատար ածեն»։
«Ժողովուրդ» օրաթերթը գրում է. ««Ժողովուրդ» օրաթերթի՝ իրավապահ համակարգին մոտ կանգնած աղբյուրները տեղեկություններ են հայտնում, որ ՀՀ Հակակոռուպցիոն կոմիտեն առաջիկայում ԱԺ պատգամավոր Հովիկ Աղազարյանի կաշառքի գործով նախաքննության ավարտ կհայտարարի ու գործը կուղարկի դատարան:
Ինչպես հայտնի է, մանր եղջերավոր անասուններ Արաբական Միացյալ Էմիրություններ արտահանելու կաշառքի քրեական գործով անցնում են ԱԺ պատգամավոր Հովիկ Աղազարյանը եւ եւս երկու անձինք, որոնցից նա կաշառք էր պահանջել:
Մասնավորապես, ԱԺ պատգամավոր Հովիկ Աղազարյանի դեմ ցուցմունք տված անձը՝ Աշոտ Կամավոսյանը, պատմել է իրավապահներին, որ 300 հազար ԱՄՆ դոլար կաշառքը չեն կարողացել տալ Աղազարյանին ու վերջում պայմանավորվել են 100 հազար դոլար տալ նրան։ Գնացել, հանդիպել են պատգամավորին ՀՀ Ազգային ժողովին հարակից զբոսայգում, եւ հենց այնտեղ Աղազարյանին 20 հազար դոլար է առաջարկվել, սակայն պատգամավորը զայրացել է ու ասել, թե «պայմանավորվել էինք 100 հազար ԱՄՆ դոլար, ինչո՞ւ եք քիչ բերել, չեմ վերցնում»:
Առաջարկել է՝ «կգնա՛ք, կավելացնե՛ք նոր կգաք»։
Արդյունքում, ԱԺ պատգամավոր Հովիկ Աղազարյանը, Աշոտ Կամավոսյանը եւ Սլավիկ Պողոսյանը հայտնվեցին մեղադրյալի աթոռին: Կաշառքի գործով Աշոտ Կամավոսյանի եւ Սլավիկ Պողոսյանի վարույթը առանձնացվեց եւ փոխանցվեց Հակակոռուպցիոն դատարան: Վերջինս կայացրեց դատավճիռ՝ նրանց մեղավոր ճանաչելով առաջադրված մեղադրանքներում, եւ որպես պատիժ սահմանեց ազատազրկում՝ 2 տարի 6 ամիս ժամկետով։
ՀՀ քրեական օրենսգրքի 84-րդ հոդվածով սահմանված կարգով՝ որոշում է կայացվել «ազատազրկման ձեւով նշանակված պատիժը պայմանականորեն չկիրառել՝ սահմանելով փորձաշրջան 3 (երեք) տարի ժամկետով»։
Տեսնենք՝ ինչ է սպասվում պատգամավորին»։
«Փաստ» օրաթերթը գրում է.
«Նիկոլ Փաշինյանը, որը Մարտի 1-ին հրահրել է, որ տրոլեյբուսներ վառեն, խանութներ թալանեն, որը կազմակերպել է մեծ բախումներ, ինչի հետևանքով զոհեր են եղել, ու թողել փախել է, հիմա էլ ասում է՝ գնում եմ Վեհարանը գրավեմ, Կաթողիկոսին հեռացնեմ», -ասում է «Համահայկական ճակատ» շարժման ղեկավար, ՀՀ պաշտպանության նախկին նախարար, գեներալ-մայոր Արշակ Կարապետյանը՝ հավելելով, թե Նիկոլ Փաշինյանը հայ ազգի ամենամեծ թշնամին է, թիվ մեկ թշնամին է, ավելի վտանգավոր է, քան Թուրքիան ու Ադրբեջանը:
Փաշինյանն ասում է, թե դա անելու է ոչ թե որպես վարչապետ, այլ որպես ՀՀ քաղաքացի: «Ես էլ եմ ՀՀ քաղաքացի, ես էլ, ուրեմն, կարող եմ ասել, գնում եմ վարչապետի նստավայրը գրոհեմ, Նիկոլին այնտեղից դուրս շպրտեմ: Ու, այո, մտնելու ենք և դուրս շպրտենք,-նշում է Կարապետյանն ու հավելում,-թող մի երկու քրեական վարույթ էլ նախաձեռնի ու գնա սառը ցնցուղ ընդունի»:
Ըստ պաշտպանության նախկին նախարարի, Նիկոլ Փաշինյանը քաղաքացիական պատերազմ է հրահրում, նա ցանկանում է բախումներ կազմակերպել. «Մենք հիմա քաղաքացիական պատերազմի շեմին ենք, որը չափազանց ծանր է լինելու Հայաստանի համար: Ու դրան դրդում է Հայաստանի այսօրվա իշխանությունը՝ Նիկոլ Փաշինյանի գլխավորությամբ: Եթե ընդդիմադիր գործիչները կալանավորվում են հենց միայն կարծիք հայտնելու համար, եթե ցանկանում է զավթել Եկեղեցին, եթե փակում է իշխանությունը փոխելու օրինական բոլոր ճանապարհները, ապա այդ իշխանությանը գցելու միայն մեկ ձև է մնում, այն է՝ ժողովրդի կոշտ ապստամբությունը: Ու դա թելադրում են հենց իշխանությունները»:
Կարապետյանի խոսքերով, հայ ժողովուրդը, սակայն, երբեք չի հանձնվել: «Մենք էլ մեր ժողովրդի մի մասնիկն ենք ու չենք հանձնվելու երբեք, ու հաղթելու ենք: Նիկոլն ապագա չունի, նա պետք է հեռացվի ու հեռացվելու է»,-ամփոփում է Արշակ Կարապետյանը: