Նիկոլ Փաշինյանը Ժողովրդավարության հայկական ֆորումի շրջանակում մասնակցում է պանելային քննարկման: Նա պատասխանում է նաև ներկաների հարցերին:
Մասնավորապես, հարցին, թե ինչպես են փոխվել Փաշինյանի հայացքները 2018 թվականին արված հայտարարություններից հետո, այն մասին, թե նախկին «Իմ քայլը» դաշինքը չուներ գաղափարախոսություն և իրենք դեմ են գաղափարախոսությանը, Փաշինյանը պատասխանեց․
«Ես չեմ ասել, որ «Քաղաքացիական պայմանագիր» կուսակցությունը գաղափարախոսություն չունի։ Մենք ասել ենք, որ ՔՊ գաղափարախոսությունը «իզմերից» անդին է։ Մեր գաղափարախոսությունը հենց ժողովրդավարությունն է, որը առաջ էր մղում մեզ դեպի հեղափոխություն։ Ժողովրդավարությունը շարունակում է լինել և մնալ Հայաստանի բրենդը»:
Փաշինյանն անդրադարձավ նաև ՀՀ նախագահի՝ ժողովրդավարության ու արցախյան հիմնախնդրի մասին մեկնաբանությանը ․
«Նախագահը խոսեց ժողովրդավարության և արցախյան հիմնախնդրի հարաբերությունների դրույթների մասին։ Ինձ համար այդ թեմայի կարևորագույն պրոբլեմներից մեկն այն է, որ, ըստ էության, ժողովրդավարության բացակայությունը ծառայել է գործին, որ մենք չիմանանք ողջ ճշմարտությունը Արցախի հարցի մասին։ Սա շատ կարևոր նրբություն է: Այն մոդելը, որ փորձագետների մակարդակով Ղարաբաղյան հակամարտության մասին գիտեն միայն մի քանի հոգի, դրա վառ ապացույցն է, և ամենամեծ պրոբլեմը, որին մենք բախվել ենք, հենց դա է: Եվ դա է պատճառը, որ մենք հիմա նոր իմաստներ ու ենթատեքստեր ենք իմանում»,- նշեց նա:
Մանրամասները՝ տեսանյութում