Ճակատագրի հեգնանք է:

Այն նույն համագումարում, երբ Նիկոլ Փաշինյանը հպարտությամբ հայտարարում էր, թե իրենց իշխանությունը Հայաստանում փակել է կեղծված ընտրությունների էջը, տեղի ունեցան ՔՊ վարչության ընտրություններ, որոնց արդյունքները, ինչպես հետո պարզվեց, կեղծվել են:

ՔՊ-ի գործիչները տեղի ունեցածը «սխալ հաշվարկ» են համարում, բայց շատ քչերն են հավատում այս վարկածին, ավելին՝ ԶԼՄ-ները գրում են, թե տեղի է ունեցել կազմակերպված ընտրակեղծարարություն՝ պատգամավոր Արփի Դավոյանի համակարգմամբ:

Ինչևէ, նախօրեին ուշ երեկոյան մեկնարկած և ողջ գիշեր տևած վերահաշվարկի արդյունքում նորընտիր վարչության կազմում փոփոխություններ են արվել՝ փոխվարչապետ Համբարձում Մաթևոսյանը և ՔՊ խմբակցության ղեկավար Հայկ Կոնջորյանը դուրս են մնացել վարչության կազմից` իրենց տեղը զիջելով Արսեն Թորոսյանին և Արմեն Փամբուխչյանին։

Ինչո՞ւ ենք պնդում, թե ունեցածի հիմքում ոչ թե տեխնիկական բաղադրիչն է, այլ՝ կեղծիքը:

Նախ, ընդամենը 1000 ընտրողը շատ փոքր թիվ է, որպեսզի ծանրաբեռնվածությունը տեխնիկական խնդիրներ հարուցեր:

Երկրորդ, ամենայն հավանականությամբ՝ ՔՊ «հարմար» վարչություն ունենալու հրահանգը տրվել է հենց Փաշինյանի կողմից, իսկ Դավոյանն ու մյուսների ընդամենը հրահանգ կատարողներն են: 

Այս պարագայում՝ Փաշինյանը սխալ հաշվարկ է արել:

Նա կորցրել է իրականության զգացումը ու հաշվի չի առել, որ իշխանությունն ու ՔՊ-ն այլևս միասնական թիմ չեն, ինչի հետևանքով աղմուկ է բարձրացել:

Այսքանով խնդիրները չեն ավարտվում:

Վստահ կարող ենք պնդել, որ ՔՊ գործող վարչությունն այլևս լեգիտիմ չէ, որովհետև վարչության կազմը «խմբագրվել» է համագումարից դուրս, թեկուզ՝ արդարության վերականգնման նպատակով:

Եվ վերջապես, եթե ՔՊ-ն կեղծում է իր վարչության ընտրությունները, ապա կարելի է պատկերացնել, թե ինչ է տեղի ունենալու համապետական ընտրությունների ժամանակ:

Հայաստանում օրինական ընտրությունների էջը փակված է:

Վահրամ Բագրատյան