Ուրբաթ օրը Ջակարտայի նավահանգիստ է հասել չինական արտադրության արագընթաց գնացքների վագոնների առաջին խմբաքանակը, տեղեկացրել է AP-ը։

142,3 կիլոմետրանոց երկաթուղին՝ 5,5 մլրդ դոլար արժողությամբ, կառուցվում է PT Kereta Cepat Indonesia-China ընկերության  կողմից։ Այն չորս ինդոնեզական պետական ընկերությունների եւ China Railway International Co. Ltd-ի համատեղ ձեռնարկություն է։ Վերջինը հավաստիացրել է, որ գնացքներն ամենաարագն են լինելու Հարավարեւելյան Ասիայում։

Ջակարտան եւ Հարավային Ճավայի Բանդունգ քաղաքը միացնող երկաթուղին չինական «Գոտի եւ ուղի» ենթակառուցվածքային նախաձեռնության մի մասն է։ Սպասվում է, որ այն կկրճատի ժամանակն ու տարածությունը երկու քաղաքների միջեւ՝ ներկայիս երեք ժամից հասցնելով 40 րոպեի։

Ութ վագոնները եւ տեսչական գնացքը ուրբաթ հասել են Ջակարտա, դրանք նախագծվել են CRRC Qingdao Sifang Co. Ltd-ի կողմից։

2016թ. հունվարին սկսվեց Ջակարտա-Բանդունգ երկաթուղու շինարարությունը, որը նախատեսված էր որպես 750 կիլոմետրանոց արագընթաց գծի մի հատված եւ պետք է անցներ գլխավոր՝ Ճավա կղզու չորս նահանգներով։

Երկաթուղու շինարարության գործարքը ստորագրվել էր 2015թ., այն բանից հետո, երբ Ինդոնեզիան մրցույթում Չինաստանն ընտրել էր Ճապոնիայի փոխարեն։ Չինաստանը համաձայնել էր ավարտել երկաթուղու շինարարությունը՝ առանց Ինդոնեզիայի պետական միջոցների օգտագործման եւ չպահանջելով վարկերի գծով պետական երաշխիքներ։

Սպասվում էր, որ երկաթուղին կսկսի աշխատել 2019թ. սկզբին, բայց այն հետաձգվեց հողի եւ ֆինանսավորման ձեռքբերման հետ կապված խնդիրների պատճառով։