Մենք խորհրդարանից չենք գնացել, որ հիմա էլ վերադառնանք: Պարզապես հայտարարել ենք, որ ԱԺ-ի լիագումար նիստերին չենք մասնակցելու, կմասնակցենք այն բոլոր հարցերին, որոնք համարում ենք մեր օրակարգը՝ ազգային, ռազմավարական, անվտանգային, Արցախին վերաբերող։ Այս մասին լրագրողների հետ զրույցում ասաց «Հայաստան» խմբակցության պատգամավոր Գեղամ Մանուկյանը
«Պետք է հիշեցնեմ, որ խորհրդարանի բոյկոտի մասին հայտարարություն եղավ, ԱԺ-ում հայտարարեցինք արտահերթ նիստի մասին, որտեղ նախանշվում էին այն բոլոր կարմիր գծերը, որոնք վերաբերում են բանակցային գործընթացին»,-ասաց Մանուկյանը։
Գեղամ Մանուկյանը նշում է, որ նախորդ քառօրյային իրենց խմբակցության շատ պատգամավորներ մասնակցել են և հանդես են եկել հայտարարություններով, որը իշխանությունը փորձել է ձևախեղել, թե հայտարարությունները նվիրված են եղել Կոնստանտին Զատուլինին, այնինչ վեց կամ յոթ հայտարարություն է եղել, որոնցից միայն մեկն է եղել Զատուլինին վերաբերող (վերջինիս մուտքը Հայաստան, հիշեցնենք, արգելվել է- խմբ.)։
Արդյո՞ք խմբակցության բոլոր անդամները կմասնակցե՞ն ԱԺ նիստերին, թե՞ ո՛չ, Մանուկյանը պատասխանեց, որ խմբակցության տեսակետը միասնական է. եթե որոշում է կայացվում, կայացնում է միասնական և բոլորի համար պարտադիր։