Այսօրվա դրությամբ զոհերի ճշգրտված թիվը 105 է։ Այդ մասին այսօր ԱԺ-ում հայտարարեց Նիկոլ Փաշինյանը։
Նա նշեց, որ ևս մեկ անգամ գլուխ է խոնարհում մեր նահատակների առաջ։ «Ինչ վերաբերում է տարածքին, երբ մենք ասում ենք, որ Ադրբեջանը ագրեսիա է կիրառում Հայաստանի նկատմամբ, նկատի ունենք, որ որոշակի տարածքի նկատմամբ հսկողություն է սահմանել։ Այս ենք մենք ասել ՀԱՊԿ-ին։ Որովհետև եթե տարածքներ գրավված չլինեն․․․, ընդ որում շատ շահարկումներ կան, թե մենք որ հոդվածի հիման վրա ենք դիմել ՀԱՊԿ-ին։ Դիմել ենք չորրորդ հոդվածի հիման վրա՝ այսինքն՝ ՀԱՊԿ անդամ երկրի վրա ագրեսին համարվում է ագրեսիա ՀԱՊԿ անդամ բոլոր երկրների վրա»,- ասաց Փաշինյանը։
Այսինքն, ըստ Փաշինյանի, մենք ՀԱՊԿ-ից խնդրել ենք օգնություն, այդ թվում՝ ռազմական, ՀՀ տարածքային ամբողջականությունը պահելու, և ՀՀ տարածքից ադրբեջանական զորքերի դուրսբերումն ապահովելու համար։ «Այդ թվում մենք այստեղ նաև նկատի ունենք 2021 թվականի մայիսի 12-ին Սոթք-Խոզնավար հատվածում տեղի ունեցած ներխուժումը։ Եվ սա մենք ֆիքսում ենք որպես քաղաքական նպատակ․ ագրեսորը պետք է ՀՀ տարածքից դուրս գա»,- ներկայացրեց Փաշինյանը։