Ոչ մի դրական սպասում չունենք Արցախի պատվիրակության և ՀՀ իշխանության ներկայացուցիչների հանդիպումից։ Այս մասին այսօր MediaHub.am-ի հետ զրույցում ասաց ԱՀ ԱԺ «Արդարություն» խմբակցության ղեկավար Դավիթ Գալստյանը։

Նշենք, որ դեռ հայտնի դարձավ, որ վարչապետ Նիկոլ Փաշինյանը և Արցախի նախագահը հանդիպել են, որի մասին հայտարարվեց երկու կողմերի խոսնակների մակարդակով, սակայն պաշտոնական որևէ հաղորդագրություն չտարածվեց։

«Մեր պատվիրակությունն էլ չգիտեմ՝ հանդիպումներ ունեցել են, թե ոչ, ամեն դեպքում այս պահին լրահոսում ոչինչ չկա»,-ասաց նա։

Հարցին, թե ինչո՞վ է պայմանավորված ոչ դրական ակնկալիքներ ունենալը, վերջինս պատասխանեց՝ նախորդ հանդիպման փորձն է դա վկայում, քանի որ նախորդ հանդիպման ընթացքում նույնիսկ մեղադրել են Արցախի պատվիրակությանը, թե ՀՀ իշխանության հայտարարությունները ճիշտ չեն հասկացել։

«Վստահեցրին, թե կանգնած ենք Արցախի ժողովրդի կողքին, բոլոր դեպքերում՝ շատ լավ իմանալով արցախցիների դիրքորոշումը, սակայն գործնականում տեսնում ենք, որ լրիվ այլ ուղով են շարժվում։ Այս իշխանությունը ժողովրդին մոլորեցնելու օրակարգն է որդեգրել՝ նրանք վստահեցնում են, սակայն ոչ հայանպաստ փաստաթղթեր են ստորագրում»,-ընդգծեց Գալստյանը։

Ավելի վաղ նաև հայտնել էինք, որ Արցախի ԱԺ նախագահ Արթուր Թովմասյանը չի դիմել ՀՀ ԱԺ նախագահ Ալեն Սիմոնյանին հանդիպելու նպատակով, Գալստյանի խոսքով՝ գուցե ակնկալիքներ չի ունեցել Սիմոնյանից, դրա համար էլ չի դիմել։ «Հնարավոր է, որ մտածում է՝ այն հարցերը, որ ունի, դրանց Ալեն Սիմոնյանը չի կարող պատասխանել»։

Նշենք, որ ըստ MediaHub-ի ունեցած տեղեկությունների, ԱԺ նախագահի գլխավորած պատվիրակությունը հնարավոր է վաղը հանդիպումներ անցկացնի ԱԺ-ում, սակայն դեռ հստակություն այս հարցում չկա:

Լիաննա Թորոսյան