Սեպտեմբերի 13-ին Ադրբեջանի կողմից ՀՀ սահմանի ողջ երկայնքով սանձազերծվել են լայնածավալ ռազմական գործողություններ, որի հետևանքով այս պահի դրությամբ հայտնի է 135 զոհի մասին, բայց թիվը դեռ վերջնական չէ: Այս իրադարձություններին եղան միջազգային հանրության հասցեական գնահատականներ:
Հայաստանի և Ադրբեջանի միջև նոր բախումներին են անդրադարձել միջազգային մի շարք հեղինակավոր լրատվամիջոցներ։
CNN-ն իր անդրադարձում, մասնավորապես, նշում է. «Ռուսաստանը պնդել է, թե միջնորդել է Հայաստանի և Ադրբեջանի միջև հրադադարի հաստատմանը, մինչդեռ երկու երկրների սահմանին բռնկվեցին մարտեր, որոնք տասնամյակներ շարունակվող հակամարտության վերսկսման եզրին են կանգնեցրել»:
Washington post-ը հայ-ադրբեջանական կոնֆլիկտի մասին պատմական ակնարկ է ներկայացրել, ապա գրել.
«Տարածքում ադրբեջանա-հայկական ուժերի միջև պարբերաբար բախումներ են տեղի ունեցել, սակայն վերջին մարտերը ամենալուրջն էին 2020 թ. եռակողմ համաձայնագրից հետո»:
BBC-ի ռուսական ծառայությունը հայ-ադրբեջանական նոր բախումները վերջին շրջանի համար աննախադեպ է համարել.
«Սեպտեմբերի 13-ի գիշերը Ադրբեջանի զորքերը կրակ բացեցին հարևան Հայաստանի տարածքի վրա։ Վերջին ամիսներին սա տարածաշրջանում առաջին սրացումը չէ, բայց, իհարկե, աննախադեպ է՝ հրետակոծության տակ ընկան ոչ միայն սահմանային քաղաքները, այլև հայկական հանգստավայր Ջերմուկը»։
Al Jazeera-ն էլ գրել է՝ Հայաստանի և Ադրբեջանի միջև լիարժեք հակամարտությունը կարող է ներգրավել այնպիսի տերությունների, ինչպիսիք են Ռուսաստանը և Թուրքիան, և ապակայունացնել նավթ և գազ տեղափոխող կարևոր միջանցքն այն դեպքում, երբ Ուկրաինայում մարտերը խաթարում են էներգակիրների մատակարարումները.
«Ռուսաստանը, որը Կովկասում գլխավոր ուժային միջնորդն է և Հայաստանի դաշնակիցը Ռուսաստանի գլխավորած Հավաքական անվտանգության պայմանագրի կազմակերպության (ՀԱՊԿ) միջոցով, ձախողել է հրադադարի հարցում»։
Ստեղծված իրավիճակը շատ ակտիվ լուսաբանում են ռուսական և հետխորհրդայի պետությունների լրատվականները ևս:
Բացի միջազգային մամուլից, սահմանին Ադրբեջանի սանձազերծած ռազմական բախմանը անդրադարձել են նաև մի շարք օտարերկրյա բարձրաստիճան պաշտոնաներ, անհատներ, իրենց սատարումը հայտնելով զոհերի հարազատներին և կոչ անելով կողմերին ցուցաբերել զսպվածություն: