Բոլորիս մոտ հարց է առաջանում ՝ ինչպես սնվել ամռանը, որպեսզի զերծ մնալ թունավորումներից ու լինել առողջ։
«Դա շատ կարևոր հանգամանք է, պետք է հասկանալ, որ ամռանը Հայաստանում ջերմաստիճանը բարձր է և պետք է հասկանալ, որ թունավորումից խուսափելու համար պետք է հետևել սննդակարգին»,- MediaHub-ի հետ զրույցում ասաց սննդաբան Դավիթ Պիպոյանը։
Ըստ նրա՝ ամռանը հիանալի հնարավորություններ կան օգտագործելու թարմ միրգ ու բանաջարեղեն, բայց, ցավոք սրտի, հետազոտություններից պարզ է դառնում, որ Հայաստանի Հանրապետությունում բնակչությունը չի կարողանում ապահովել մի շարք միջազգային մասնագետների կողմից երաշխավորվող մրգի ու բանջարեղենի օրական մինիմալ քանակը։
«ՀՀ բնակչությունը մրգի ու բանջարեղենի քանակը օրգանիզմում ապահովում է հիմնականում ամռանը»,- նկատեց սննդաբանը։
Մեր զրուցակցի հավաստմամբ՝ ամռանը պետք է հիշել մեկ կարևոր բան, որ ջերմաստիճանը բարձր է ոչ միայն դրսում, այլ հենց մեր բնակարաններում և եթե տանը շոգ է, ապա հնարավոր է, որ սնունդը փչանա․
«Օրինակ, պետք չէ թթվասերը ամբողջությամբ դնել սեղանին, քանի որ շոգի պատճառով հնարավոր է այն շուտ փչանա»։
Ըստ նրա, շատ կարևոր գործոն է այն, որ սննդամթերքը ճիշտ պատրաստվի, լավ եփվի, իսկ միրգ, բանջարեղենը պետք է լավ լվանալ, ցանկալի է նաև սոդայաջրով կամ քացախաջրով։
Տաք սեզոնին և հաշվի առնելով այն հանգամանքը, որ մենք շատ ենք քրտնում, պետք է օրգանիզմը ջրակայուն դարձնել, իսկ դրա համար, շեշտում է Պիպոյանը, խիստ անհրաժեշտ է, որպեսզի օգտագործենք թարմ մրգեր, ջուր և խուսափենք մեծ ճարպաթթուներ պարունակող ուտելիքներից:
Խոսելով արագ սննդից և հայերիս դրա նկատմամբ տածած սիրուց, Դավիթ Պիպոյանը զգուշացրեց՝ այս տաք եղանակներին հնարավորինս պետք է հեռու մնալ դրանից, քանի որ այն բարձրացնում է օրգանիզմում շաքարի պարունակությունը։
“Նույնը կարող ենք ասել գազավորված ըմպելիքների մասին, դրա փոխարեն ճիշտ է օգտագործել թան, բնական հյութ կամ բնական կոմպոտներ: Խորհուրդ կտամ այս եղանակին խուսափել երշիկեղենից, առավելագույնս նվազեցնել դրա օգտագործումը, հատկապես այն ժամանակ, երբ մենք գնում ենք քաղաքից դուրս՝ ոչ մի պարագայում չի կարելի երշիկ վերցնել ճանապարհ: Նույնը խաշած ձվի, պանրի մասին է”,- շեշտեց նա։
Դավիթ Պիպոյանն ընդգծեց՝ հատկապես կարևոր է շատ ջուր խմել՝ միջինը երկու լիտր ջուր օրական:
Վիկա Աբգարյան