MediaHub-ը գրել էր, որ այս տարվա սեպտեմբերյան մարտերից հետո Սոթքի բնակիչները, բացի գույքային կորուստներից, նաեւ բերքի կորուստ են ունեցել եւ գյուղատնտեսական մշակաբույսերի, մասնավորապես, կարտոֆիլի բերքատվության կորստի գույքագրում կառավարությունը չի իրականացրել։ Այս մասին մեզ հետ զրույցում ասել էին պատերազմից տուժած ֆերմերները։

Գեղարքունիքի մարզպետը պնդում էր հակառակը, թե իբր սուտ է, որ Սոթքի բնակիչները բերքի կորուստ են ունեցել։ Այս առնչությամբ գրավոր հարցում էինք արել ՀՀ տարածքային կառավարման եւ ենթակառուցվածնքերի նախարարություն՝ հետեւյալ հարցադրմամբ՝ 2020 եւ 2022 թվականներին մարտական գործողությունների ընթացքում Գեղարքունիքի մարզի Սոթք բնակավայրում գյուղատնտեսական նշանակության բերքի կորստի գույքագրում արվե՞լ է։

Այս ուղղությամբ ի՞նչ աշխատանքներ է տարվել։

Խնդրել էինք տարանջատել գյուղատնտեսական նշանակության տեխնիկայի, տների գույքագրումը՝ բերքի գույքագրումից։ Խնդրել էինք նաեւ առանձին ներկայացնել, թե Սոթքի բնակավայրի բնակիչները ի՞նչ վնասներ են կրել, ֆինանսական աջակցություն տրամադրվել է սեպտեմբերի 12-13-ի պատերազմի ժամանակ տուժած ֆերմերներին։ Նրանց բերքի, մասնավորապես կարտոֆիլի արտերի վնասի գույքագրում արվե՞լ է։

Տարածքային կառավարման եւ ենթակառուցվածքների նախարարի տեղակալ Նարեկ Մանուկյանը պատասխանել է, որ Գեղարքունիքի մարզի Սոթք բնակավայրում գյուղատնտեսական նշանակության բերքի կորստի վերաբերյալ քննարկում է տեղի ունեցել Գեղարքունիքի մարզպետարանի հետ եւ Վարդենիս համայնքի ֆիզիկական եւ իրավաբանական անձանց վնասները գնահատող համայնքային հանձնաժողովի կողմից գույքագրում է կատարվել ու արձանագրվել հետեւյալ վնասները։ «Վնասվել են թվով 3 միավոր տրակտորներ եւ 1 հատ հացահատիկահավաք կոմբային։ Հրետակոծության հետեւանքով վնասվել են 147 անհատական բնակելի տներ, որոնց պատճառված վնասը կազմել է 67 մլն 369 հազար ՀՀ դրամ։ Քանդման ենթակա են ճանաչվել 4 անհատական բնակելի տներ եւ 1 խանութ, որոնց պատճառված վնասները համապատասխանաբար կազմել են 148 մլն 250 հազար ՀՀ դրամ եւ 10 մլն ՀՀ դրամ։ Վնասվել են դպրոցի եւ գյուղապետարանի շենքերը, որոնց պատճառված վնասը կազմել է 3 մլն 752 հազար դրամ։

Գյուղատնտեսական նշանակության բերքի կորուստ տեղի չի ունեցել»,-ասված է պատասխանում։
Ավելի վաղ MediaHub-ի հետ զրույցում Սոթքի բնակիչներն ասել էին, որ պատերազմի օրերին չեն կարողացել մշակել կարթոֆիլի արտերը, ինչը հանգեցրել է տոննաներով բերքի կորստի։

«Պատերազմից հետո կարտոֆիլի արտերը «վարի» գնաց։ Դիմել ենք կառավարություն, օգնություն չի հատկացնում։ Բանկերն էլ մասնավոր ընկերություններ են, չենք կարող մեղադրել։ Այստեղ պետությունը անելիք ունի։ Մի քանի ֆերմերների, այդ թվում՝ իմ բերքը ամբողջության փչացել է»,- MediaHub-ի հետ զրույցում ասել էր Հակոբ Ավետյանը՝ նշելով, որ երկու տարբեր բանկերից ընդհանուր առմամբ գրավադրմամբ վերցրել է մոտ 600․000 ԱՄՆ դոլար։

Վարդան Հայրապետյանը եւս պատերազմի հետեւանքով տուժած խոշոր ֆերմերներից է։ Մարզպետին հակադարձում է՝ իր դաշտում 5-6 արկ է ընկել, աշխատողը վախեցել է կարտոֆիլի դաշտ մտնել։

«Ինչի՞ ենք սուտ ասում։ Իմ երեխեքին գյուղից չհանեի, ինչ է, գնայի կարտոշկա ջրեի՞։ Խի մարզպետի ասելով ա՞, փաստ կա, չէ՞»,-ասել էր նա։

Սոթքի բնակիչը պնդում է՝ բերքի գույքագրում չի իրականացվել։

«Իբրեւ թե տների համար շատ են գալիս գույքագրում անում, ուր մնաց՝ բերքի համար գան»,-վրդովված նշել էր Հայրապետյանը։

Սոթքի մեկ այլ բնակիչ՝ Գագիկ Ագանեսյանն էլ նշել էր, որ գյուղի հրետակոծության ժամանակ մի կերպ են փախել, իսկ այդ օրերին արտը նվազագույնը պիտի 2 անգամ ոռոգվեր։

«40-50 տոկոս բերքը չմեծացավ, ինչն էլ, որ աճել էր, որդերը կերան։ Իմ գյուղատնտեսական նշականության հողատարածք մարզպետը չի եկել, հետեւաբար չի կարող պնդել, որ ֆերմերը սուտ է խոսում։ Պատերազմի ժամանակ մի կերպ ենք փախել գյուղից, ո՞վ պիտի իր կյանքը վտանգեր»,-ասաց նա։

Լիա Սարգսյան