Նոյեմբերի 23-ին ՌԴ նախագահ Վլադիմիր Պուտինը ժամանելու է Երևան՝ մասնակցելու ՀԱՊԿ Հավաքական անվտանգության խորհրդի նստաշրջանի աշխատանքներին:

Ավելի վաղ տեղեկացրել էինք, որ նիստի շրջանակում Պուտին-Փաշինյան երկկողմ հանդիպում կլինի: Բայց ահա MediaHub-ի դիվանագիտական աղբյուրները հայտնում են, որ երկկողմ հանիդպումը խիստ հարցականի տակ է: Եվ ոչ միայն դա:

Այս տարվա ապրիլին  Ռուսաստանի Դաշնություն կատարած իր պաշտոնական այցի շրջանակում Նիկոլ Փաշինյանը հրավիրեց Վլադիմիր Պուտինին տարվա երկրորդ կեսին այցելել Երևան՝ կապված ՀԱՊԿ Հավաքական անվտանգության խորհրդի նստաշրջանի հետ: Այլ կերպ ասած՝ համատեղել և՛ նիստի մասնակցությունը, և՛ պետական այցը, որ տարիներ շարունակ հետաձգվում է: Ըստ հաղորդագրության՝ հրավերն ընդունվել էր: Դրա ֆոնին ՌԴ ԱԳՆ-ից հայտնել էին ռուսական լրատվամիջոցներին, որ այդ այցի շրջանակներում Պուտինը Երևանում կմասնակցի ռուս-հայկական բարեկամությանը նվիրված հուշարձանի բացմանը:

Սակայն անցան ամիսներ, Վլադիմիր Պուտինի Հայաստան կատարվելիք պետական այցի հետ կապված որևէ նոր բան այդպես չեղավ, բայց հայտնի է, որ նա կժամանի Երևան ՀԱՊԿ գագաթաժողովին մասնակցելու համար:

Ճիշտ է, Պուտինը դրա շրջանակում կժամանի Երևան, բայց, ինչպես ավելի վաղ MediaHub-ը գրել էր, դա պետք չէ նույնականացնել Հայաստան կատարվելիք այցի էության ու բովանդակության հետ: Ասել է թե՝ կազմակերպության հերթական նիստն է անցկացվում Երևանում, ոչ թե Պուտինն է գալիս Երևան: 

Բայց, անշուշտ, ՔՊ-ին հավատացող ընտրազանգվածն այս նրբությունները չի հասկանում ու ընկալում, և Պուտինի մի քանի ժամով Երևան գալը կներկայացվի իբրև Նիկոլ Փաշինյանի արտաքին քաղաքականության ոլորտում  «հերթական փայլուն հաղթանակ»:

MediaHub-ի աղբյուրը նշեց՝ Պուտինը գոնե այս այցի ընթացքում հայ-ռուսական բարեկամության արձանի բացմանը չի մասնակցելու, նման կետ նրա օրակարգում չկա, ինչպես նաև այս պահին երկկողմ հանդիպման մասին խոսք չկա: Բայց, ընդգծեց նա, քանի որ մինչ այցը հնարավոր է զարգացումներ լինեն և, հատկապես, հայկական կողմը շարունակի պնդել, որ հայ-ռուսական դաշնակցային հարաբերությունների տեսանկյունից էլ ճիշտ է, որ Պուտին-Փաշինյան առանձին հանդիպում տեղի ունենա, ապա հնարավոր է կարճատև տետ-ա-տետ ձևաչափի զրույց այդուհանդերձ լինի: 

Ի դեպ, մեր աղբյուրը նաև հայտնեց, որ Պուտինը Երևանում կմնա հաշված ժամեր: Սովորաբար, նման ձևաչափը ենթադրում է ժամանում երկիր, ՀԱՊԿ անդամ պետությունների առաջնորդների ոչ պաշտոնական ընթրիք, հաջորդ առավոտյան նիստի անցկացում և հետևելով նախորդ նիստերի օրինակները՝ Պուտինը ժամանում է վերջին պահին և մեկնում երկրից ամենաառաջինը:

MediaHub-ը հիշեցնում է, որ Ռուսաստանի նախագահ Պուտինն առաջին անգամ պաշտոնական այցով Հայաստան է եկել 2001 թվականի սեպտեմբերին: Սակայն մինչ այդ էլ նա արդեն Հայաստան ժամանել էր՝ վարչապետի պաշտոնում. նա 1999 թվականի հոկտեմբերի 30-ին Երեւանում հարգանքի տուրք մատուցեց ահաբեկչության զոհերի հիշատակին: Ի դեպ, նախկին նախագահներ Ռոբերտ Քոչարյանի և Սերժ Սարգսյանի օրոք Պուտինը բավականին հաճախ է ժամանել Հայաստան, այդ թվում և 2015 թվականին Հայոց Ցեղասպանության 100-ամյա տարելիցի միջոցառումների շրջանակում: 

Իրավիճակը փոխվեց 2018-ին Հայաստանում տեղի ունեցած իշխանափոխությունից հետո. Հայաստանը շարունակում է Ռուսաստանի ռազմավարական դաշնակիցը մնալ, երկու երկրների իշխանությունները հայտարարում են քաղաքական հարաբերությունների բարձր մակարդակի մասին, Փաշինյանը հաճախ է հանդիպում Պուտինի հետ՝ ոչ Հայաստանում և հեռախոսազրույցներ ունենում նրա հետ, սակայն Պուտինը Հայաստան չի գալիս: Արդեն որերորդ տարին է Պուտինի պատշոնական այցը մեր երկիր անընդհատ հետաձգվում է։ Ճիշտ է, նա Երևանում եղել է պատերազմից մեկ տարի առաջ, բայց այն ժամանակ էլ ԵԱՏՄ  գագաթնաժողովի շրջանակում, որին մասնակցեց նաև  Իրանի նախկին նախագահ Ռոհանին՝  որպես դիտորդ:  

Սպասենք, թե իշխանություններն այս այցը ինչպես կօգտագործեն և ինչպես կմանիպուլացնեն չոր փաստերը հօգուտ իրենց:

Եվ մի բան էլ. Մոսկվայում հայ-ռուսական բարեկամության հուշարձանը տեղադրվել է դեռ 1997 թվականին...