Մամուլում ավելի վաղ հրապարակվեց, որ Էջմիածին քաղաքում կառուցվում է հրեական սինագոգ։ Շինաշխատանքների ընթացքին ծանոթացել են Ռուսաստանի հրեական համայնքների ֆեդերացիայի նախագահ Ալեքսանդր Բորոդան և Եվրասիական գործարար ակումբի ղեկավար Արթուր Ասատրյանը։ Նույն ինքը՝  Դոն Պիպոն:

Սակայն պատմությունը բավականին տարօրինակ է: Նախ, Հայաստանում Հրեական համայնքից MediaHub.am-ին փոխանցեցին, որ համայնքը տեղյակ չէ սինագոգի կառուցումից։ 

«Առաջին անգամ երեկ ենք իմացել։ Հրեական համայնքի հետ չեն քննարկել, մենք Երևանում սինագոգ ունենք, չենք հասկանում հիմա երկրորդի կառուցման իմաստը: ՀՀ-ում 600-700 հրեա կա, և մեր մոտ 30 տարվա սինագոգը ամբողջությամբ բավարար էր։ Մի քանի օրվա մեջ կպարզենք, թե ինչ է իրականում տեղի ունեցել»,-ասաց մեզ համայնքի ներկայացուցիչը։ 

Էմիաջծինի համայնքապետարանի մամուլի բաժնից էլ MediaHub.am-ին փոխանցեցին, որ մամուլում տարածված տեղեկությունները կեղծ են և ոչ մի հրեական սինագոգ չի կառուցվում։ 

«Լուրերին մենք մամուլում տեսանք և կարող ենք ասել, որ նման բան չկա և ոչ մի թույլտվություն համայնքապետարանից չի եղել»,-փոխանցեցին բաժնից։

Ստանալ մեկնաբանություն, ըստ էության, այս նախաձեռնության համահեղինակ հանդիսացող Արթուր Ասատրյանից չհաջողվեց: Բայց, անշուշտ, զարգացումների նման դասավորվածության ֆոնին նրա տեսակետը լսելը հետաքրքիր կլինի:

Լիաննա Թորոսյան