ՊԵԿ նախագահ Ռուստամ Բադասյանն այսօր իր տարեկան ամփոփիչ ասուլիսում հայտարարեց, որ 2023 թվականին արձանագրվել է ՀԴՄ կիրառման կանոնների խախտման 7371 դեպք, և արձանագրվել է 2.5 մլրդ դրամի տուգանք, 146 դեպքով 98 հարկ վճարողի մոտ արձանագրվել է 1 միլիոն դրամ և ավելի տուգանք, որն իրենց օրենսդրական նորամուծության արդյունքն է։ Իսկ նորամուծությունն այն է, որ տնտեսվարողը ՀԴՄ կտրոն չտրամադրելու համար սկսել է տուգանվել ոչ թե ֆիքսված գումարով՝ 150 հազար դրամ, այլ տուգանքի չափը սկսեց կապվել տնտեսվարողի շրջանառության հետ, և հիմա ունեն մեկ միլիոն դրամ և ավելի տուգանքի կիրառման դեպքեր, որն ամեն ամիս լրագրողներն ու հանրությունը հնարավորություն ունեն՝ ստուգելու, թե ՊԵԿ-ը ամեն ամիս որտեղ, ինչ վարչարարություն է արել և անվանական ում որքան է տուգանել՝ ինչ խախտման համար։
Ըստ այդմ՝ այդ մեկ միլիոն դրամ և ավելի տուգանքի կիրառման դեպքերով Ռուստամ Բադասյանը նշեց մի շարք հայտնի սուպերմարկետների անուններ՝ «Ծիրան», «Էվրիկա», «Տիտան», «Ինեսսա», «Գուրմենիա», «Կայզեր», «Բասեն», «Արև» և այլն, որոնք տուգանվել են որոշները՝ մեկ, որոշներն էլ՝ մի քանի անգամ, ընդհանուր մինչև 30 մլն դրամի չափով։ Կան նաև բենզալցակայաններ, տնտեսական խանութներ, որոնց տուգանքների չափը երբեմն մի քանի տասնյակ միլիոն դրամի է հասնում։
Ինչ վերաբերում է «Նոր Զովք» սուպերմարկետների ցանցին, որոնց վերաբերյալ սերվերների հետ կապված քրեական գործ էր հարուցվել, ՊԵԿ նախագահն ասաց, որ այս ընկերությունը քրգործի շրջանակներում մոտ 4 մլրդ դրամի վերականգնում է արել։ Նույն կերպ «Ալեքս տեքստիլն» է. դարձյալ սերվերների հետ կապված նմանատիպ գործի շրջանակներում խոշոր չափի գումար է վերականգնել բյուջե, այս դեպքում՝ 1 միլիարդ դրամ։
Վահե Մակարյան