ԵՄ-ն մտահոգություն է հայտնել Աթենքի դեմ Անկարայի «թշնամական արտահայտությունների» կապակցությամբ այն բանից հետո, երբ Թուրքիայի նախագահ Թայիփ Էրդողանը Հունաստանին մեղադրել է Էգեյան ծովում ապառազմականացված կղզիները «օկուպացնելու» մեջ, եւ ասել է, որ Թուրքիան պատրաստ է «անհրաժեշտ ամեն ինչ անել», երբ ժամանակը գա, հաղորդում է Reuters-ը:
«Հունաստանի հասցեին Թուրքիայի քաղաքական ղեկավարության մշտական թշնամական արտահայտությունները լուրջ մտահոգություն են առաջացնում եւ լիովին հակասում են արեւելյան Միջերկրական ծովում դեէսկալացիայի այնքան անհրաժեշտ ջանքերին»,- ասել է Եվրամիության արտաքին գերատեսչության մամուլի քարտուղար Փիթեր Սթանոն:
«Սպառնալիքներն ու ագրեսիվ հռետորաբանությունն անընդունելի են եւ պետք է դադարեցվեն»,- հավելել է նա՝ ընդգծելով տարաձայնությունները խաղաղ կարգավորելու եւ միջազգային իրավունքը լիարժեք հարգելու ԵՄ պահանջները։
«ԵՄ-ն կրկին հայտարարում է, թե ակնկալիքներ ունի, որ Թուրքիան լրջորեն կաշխատի լարվածությունը կայուն կերպով նվազեցնելու վրա՝ ելնելով արեւելյան Միջերկրական ծովում տարածաշրջանային կայունության շահերից, եւ լիարժեք կհարգի ԵՄ անդամ բոլոր երկրների ինքնիշխանությունն ու տարածքային ամբողջականությունը»,- ասել է Սթանոն։
Վերջերս Անկարան Աթենքին մեղադրել է Էգեյան ծովի ապառազմականացված կղզիները սպառազինելու մեջ, ինչը Աթենքը հերքում է, սակայն Էրդողանը նախկինում Հունաստանին չի մեղադրել դրանք օկուպացնելու մեջ։