Սահմանային դրությունը ներկա պահին հարաբերական կայուն է։ Այդ մասին Ջերմուկում լրագրողների հետ զրույցում ասաց ԳՇ պետ Էդվարդ Ասրյանը։
Նրա խոսքով, բայց և այնպես, հակառակորդի կողմից Սյունիքի ու Գեղարքունիքի հատվածում գրանցվում են հրադադարի ռեժիմի խախտումներ։
«Հակառակորդը նպատակ ունի իրավիճակը լարված պահելու։ Այժմ հակառակորդը Հայաստանի ինքնիշխան տարածքից զավթել է 139 կմ² տարածք, ընդհանուր ներթափանցման խորությունը 7 կմ-ից ավել է, իսկ ճակատը՝ 11 կմ»,- նշեց նա։
ԵՄ դիտորդների հետ գործակցությանն անդրադառնալիս՝ Ասրյանն ասաց, որ բարձր է գնահատում համատեղ աշխատանքները, ամեն ինչ պատշաճ մակարդակով է իրականացվում։
«Մեր առջև դրված հարցերի շուրջ փոխգործակցում ենք, արդյունքը համարում եմ բարձր։ Կարող եմ ասել, որ իրենք իրենց առջև դրված խնդիրը կատարում են»,- նկատեց նա։
Ինչ վերաբերում է Տեղ գյուղի ուղղությամբ իրականացվող աշխատանքներին, ապա Ասրյանը նշեց, որ հակառակորդի հետ ՀՀ զինված ուժերը շփման մեջ են, ունենք ստեղծված առաջնագիծ, դիրքային համակարգ։
«Իրականացնում ենք համատեղ աշխատանքներ՝ վիճակն էլ ավելի բարելավելու, հակառակորդի նկատմամբ առավելության հասնելու համար»,- նշեց նա։