Այումինիում արտադրող հոլանդական Aldel ձեռնարկությունը ուրբաթ հայտարարել է, որ դադարեցնում է Ֆարմսումի ձեռնարկության գործունեությունը՝ վկայակոչելով էներգակիրների բարձր գները եւ պետական աջակցության բացակայությունը, տեղեկացրել է Reuters-ը։

Aldel-ը միացել է ընկերությունների այն ցուցակին, որոնք կրճատում կամ դադարեցնում են արտադրությունը Եվրոպայում, քանի որ գազի եւ էլեկտրաէներգիայի գներն այս տարի բարձրացել են հարյուրավոր տոկոսներով՝ 2021թ. մակարդակի համեմատ։

Նորվեգական Yara ընկերությունը կրճատել է ամիակի արտադրությունը, ArcelorMittal պղնձաձուլական ընկերությունն անջատել է Բրեմենի վառարաններից մեկը, իսկ բելգիական Nyrstar ցինկի ձուլման գործարանը փակել է ձուլարանը Նիդեռլանդներում։

Ալյումինիում արտադրողների մեջ է սլովենյան Talum ընկերությունը, որը հզորությունները կրճատել է 80 տոկոսով, իսկ Alcoa-ն փակում է երեք արտադրագծերից մեկը Lista գործարանում (Նորվեգիա)։

«Վերահսկվող դադարը թույլ կտա Aldel ընկերությանը պատրաստ լինել արտադրությունը նորից սկսելուն, երբ հանգամանքները բարելավվեն»,- նշվել է Aldel-ի հայտարարությունում։

Ընկերությունը դադարեցրել էր առաջնային ալյումինիումի արտադրությունը Նիդեռլանդների Delfzijl գործարանում 2021թ. հոկտեմբերին, բայց շարունակում էր վերամշակված ալյումինիումի թողարկումը։

Aldel-ը Նիդեռլանդներում առաջնային ալյումինիումի միակ արտադրողն է, ունի տարեկան 110 000 տոննա առաջնային ալյումինիում եւ 50 000 տոննա վերամշակված ալյումինիում արտադրելու հզորություններ։

Սնանկացումից եւ սեփականատիրոջ փոփոխությունից հետո վերջին տարիներին ընկերությունում աշխատում է մոտ 200 աշխատակից։ Դրա ամբողջական անվանումն է՝ Damco Aluminum Delfzijl Cooperatie U.A։