Արցախի հանքարդյունաբերական կազմակերպության աշխատակիցները և հարակից համայնքների բնակիչները շաբաթ օրը ինքնաբուխ կերպով արգելափակել են ադրբեջանական խմբի մուտքը Դրմբոնի և Կաշենի հանքավայրերի տարածք:
Ադրբեջանական կողմը, հիմք ընդունելով Արցախում տեղակայված ռուս խաղաղապահ զորակազմի հրամանատարությանը նախապես ուղղված՝ Մարտակերտի շրջանի հանքավայրերում դիտարկում անցկացնելու գրությունը, ծրագրում էր իրականացնել այցելություն հանքավայրեր:
«Խաղաղապահ զորակազմի հրամանատարության կողմից, համաձայն իրենց վերադաս մարմինների հրահանգի, թույլատրվել է մեկանգամյա տեսողական այց վերը նշված հանքավայրեր», - նշում է Արցախի տեղեկատվական շտաբը՝ հավելելով, որ քանի որ առաջարկված ծրագիրը համաձայնեցված չի եղել Արցախ իշխանությունների և հանքավայրերը շահագործող կազմակերպության հետ, արգելվել է:
Բաքուն նոտա է հղել Մոսկվա՝ կոչ անելով ռուսական կողմին ձեռք բերված պայմանավորվածություններին համապատասխան ապահովել Ադրբեջանի ներկայացուցիչների անարգել մուտքը Արցախում գտնվող հանքավայրեր մոնիտորինգի համար, կիրակի օրը հայտարարել է Ադրբեջանի ԱԳՆ պաշտոնական ներկայացուցիչ Այխան Հաջիզադեն:
Այսպիսով՝ «բնապահպանների» այն նույն խումբը, որը մեկ շաբաթ առաջ մի քանի ժամով փակել էր Լաչինի միջանցքը, հիմա էլ անարգել թափանցում է Արցախ՝ ընդերքի մոնիտորինգի մտացածին նպատակով: Ակնհայտ է, որ պաշտոնական Բաքուն նոր էսկալացիայի նախադրյալներ է ստեղծում, ընդ որում՝ հետևողականորեն քայլերի միջոցով:
Իսկ ի՞նչ են անում Հայաստանի և Արցախի իշխանությունները: Կարելի է ասել՝ ոչինչ, եթե չհաշվենք հերթապահ հայտարարությունները, որոնք տեղի ունեցածի պատասխանատվությունը դնում են ռուսական խաղաղապահ առաքելության վրա:
Բնավ չենք ուզում տպավորություն ստեղծվի, որ ռուսական կողմը պատասխանատվություն չի կրում տեղի ունեցածի համար, սակայն արդյո՞ք ողջամիտ է ոչինչ չանելու ու ողջ մեղքը երրորդ կողմի վրա գցելու մարտավարությունը:
Օրինակ, Հայաստանի իշխանությունը մինչև վերջին օրերը վստահ պնդում էր, որ մոտ ժամանակներս ինչ-որ միջազգային մեխանիզմ է ստեղծվելու, որը թույլ կտա լուծել ԼՂ խնդիրը:
Օրերս պարզվեց, որ դա լավագույն դեպքում ցանկություն է, ոչ թե պայմանավորվածություն:
Նախ Հայաստանի անվտանգության խորհրդի քարտուղար Արմեն Գրիգորյանը ուրբաթ հայտարարեց, թե իր ու Ադրբեջանի նախագահի օգնականի վաշինգտոնյան հանդիպումից հետո համաձայնություն կար ստեղծել միջազգային մեխանիզմ, որի շրջանակներում Ստեփանակերտն ու Բաքուն պետք է քննարկեին Ղարաբաղի հայերի իրավունքները և անվտանգությունը:
Հիքմեթ Հաջիևի արձագանքը չուշացավ, նա կեղծիք որակեց Գրիգորյանի հայտարարությունը՝ պնդելով, թե միջազգային մեխանիզմ ստեղծելու որևէ համաձայնություն ձեռք չի բերվել։
Հիմա ստացվում է՝ բանակցությունները հայտնվել են փակուղում, իսկ Արցախը մենակ է մնացել ադրբեջանական մարտահրավերների դեմ հանդիման, իսկ հայ- ռուսական հարաբերությունների այսօրվա մակարդակն էլ թույլ չի տալիս լավատեսություն ունենալ, թե Մոսկվայում կարող ենք գոնե ժամանակավոր լուծումներ գտնել:
Վահրամ Բագրատյան