Հասկանում եմ, թե ինչ ջղաձգված վիճակում են այս պարոնները, որ ամեն մի մեղադրական խոսքից իրենց կորցնում են ու նույնիսկ իրենք էլ չեն հասկանում իրենց արածի իմաստը։ Այս մասին այսօր MediaHub.am-ի հետ զրույցում ասաց Հայաստանի Դեմոկրատական կուսակցության նախագահ Արամ Սարգսյանը՝ մեկնաբանելով ՌԴ ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի նախագահ Կոնստանտին Զատուլինի մուտքը ՀՀ արգելելու որոշման մասին։
Սարգսյանը նշեց, որ հոկտեմբերի 28-29-ին Երևանում պետք է անցկացվեր Լազարևյան ակումբի հերթական նիստը, որին, սակայն, չի կարող մասնակցել Զատուլինը՝ նախագահողը։
«Այս մարդը Ղարաբաղյան շարժումից սկսած մինչև հիմա եղել է հայ ժողովրդի կողքին։ Հիմա այս իշխանության հոգին այնքան է մռայլվել, որ չեն կարողանում դիմանալ այն քննադատություններին, որոնք իրենց հասցեին են լսում»,-ասաց Սարգսյանը։
Դիտարկմանը, թե հատկապես 44-օրյա պատերազմից հետո Զատուլինը հաճախ էր քննադատություններով հանդես գալիս, վերջինս պատասխանեց՝ իսկ ի՞նչ էր կարծում գործող իշխանությունը.
«Այսինքն, քննադատություն ընդհանրապես պետք է չլինե՞ր, իսկ այդ պատերազմի պարտության համար ո՞վ է մեղավոր․ ո՛չ ժողովուրդը, ո՛չ բանակը, այլ այն մարդը, որ չի կարողացել ճիշտ կառավարել իրավիճակը»,-ընդգծեց նա։
Խոսելով Լազարևյան ակումբի սպասվող հանդիպման մասին՝ Սարգսյանը նշեց, որ չի կարծում, թե պետք է հրաժարվեն հանդիպումից։
«Խորհրդով պետք է լուծենք այդ հարցը, օրվա ավարտին, կարծում եմ, արդեն հստակ կասենք, թե ինչ ենք պատրաստվում անել։ Ամեն դեպքում՝ դատապարտում ենք այս հիմար քայլը, թե դրանից հետո ինչ կլինի, դեռ պետք է որոշենք։ Սովորություն են դարձրել, թշնամիների մուտքը չեն արգելում, այլ արգելում են հայ ժողովրդի պաշտպանների մուտքը, ինչպես, օրինակ, Մուրադ Փափազյանը և մյուսները»,-նշեց նա։
Լիաննա Թորոսյան