Իրաքի Քուրդիստանի շրջանում հրետակոծության հետևանքով 9 մարդ է մահացել, այդ թվում՝ երեխաներ։ Առնվազն 23 մարդ վիրավորվել է։ BBC-ի փոխանցմամբ՝ միջադեպը դիվանագիտական վեճ է առաջացրել Իրաքի և Թուրքիայի միջև: Դեպքը տեղի է ունեցել Իրաքյան Քուրդիստանի և Թուրքիայի սահմանին գտնվող Զախո քաղաքի զբոսայգում։

Տեղի պաշտոնյաները հրետակոծության համար մեղադրում են թուրքական ուժերին։ Իրաքը կանչել է Բաղդադում Թուրքիայի դեսպանին, նաև Անկարայից հետ է կանչել իր գործերի ժամանակավոր հավատարմատարին:

Իրաքի վարչապետ Մուստաֆա ալ Քազիմին Ազգային անվտանգության խորհրդի արտակարգ հանդիպում է անցկացրել և խստորեն դատապարտել «թուրքական դաժան հարձակումը, որը թիրախավորել է անմեղ քաղաքացիներին զբոսաշրջային հանգստավայրում»։ Բաղդադում, Քարբալայում և Նասիրիյայում բողոքի ակցիաներ են տեղի ունեցել։

Հրետակոծությունը դատապարտել է նաև ԱՄՆ պետքարտուղարության խոսնակ Նեդ Փրայսը։

Թուրքիան իր հերթին հայտարարել է, որ հարձակումն իրականացվել է ահաբեկչական կազմակերպությունների կողմից՝ նկատի ունենալով Քրդական բանվորական կուսակցությունը (PKK)։

Քրդական բանվորական կուսակցությունը քրդերի ավելի մեծ ինքնավարություն է քարոզում և զինված պայքարի մեջ է Թուրքիայի հետ։ Խմբավորումն ահաբեկչական է համարվում Թուրքիայում, ԵՄ-ում, ԱՄՆ-ում և Մեծ Բրիտանիայում։

Քրդերը կազմում են Թուրքիայի բնակչության 15-20%-ը, սակայն այնտեղ ենթարկվում են հալածանքների: Անկարան փորձում է արգելել քրդամետ HDP կուսակցությանը, որը մեծությամբ երրորդն է խորհրդարանում։