Վատ եմ զգում, որ տարկետման հարցն այստեղ ենք քննարկում, այս հարցը վերաբերում է կրթությանը և կրթության հանձնաժողովում պետք է քննարկվեր։ Այս մասին այսօր ՀՀ ԱԺ պաշտպանության եւ անվտանգության հարցերի մշտական հանձնաժողովի հերթական նիստի ընթացքում ասաց ՔՊ-ական պատգամավոր Հակոբ Ասլանյանը՝ խոսելով հանձնաժողովի օրակարգում տարկետման հարցերը հայտնվելու մասին։
«Իմ կարծիքով՝ բոլոր տեսակի տարկետումները պետք է հանվեն, ընդհանրապես տարկետում չպետք է լինի։ Տարկետում ստացածների 90 տոկոսն ուղղակի հետագայում չեն շարունակում իրենց գործունեությունը, չեն շարունակում կրթական համակարգում կամ այնտեղ, որի համար իրենց տարկետումը ստացել են։ Եթե մարդը նպատակ ունի իր առաջ, թող ծառայի, գնա գա իրականացնի։ Մեկը ես՝ բանակից հետո եմ սովորել, կարմիր դիպլոմով ավարտել»,-ասաց նա։
ՀՀ ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն էլ արձագանքեց, թե այստեղ հարց է դրված, որ բանակին տան կրթված մարդիկ։ «Զարմանալու բան չկա, որ այս հանձնաժողովում ենք սա քննարկում։ Տարկետումը հանված է Վիգեն Սարգսյանի թեթև ձեռքով (Պաշտպանության նախկին նախարար – խմբ.)»։
ԿԳՄՍ նախարար Վահրամ Դումանյանն էլ հավելեց, թե հանված բանն այլևս իմաստ չունի հանելու։
Լիաննա Թորոսյան