Ուկրաինայի դատարանը նախկին նախագահին 15 տարվա ազատազրկման է հեռակա դատապարտել
Ուկրաինայի գլխավոր դատախազությունը հայտնել է, որ Ուկրաինայի դատարանը նախկին նախագահ Վիկտոր Յանուկովիչին հեռակա կարգով դատապարտել է 15 տարվա ազատազրկման՝ «դասալքության հրահրման և պետական սահմանի անօրինական հատման կազմակերպման» մեղադրանքով։
Նրա հետ մեկտեղ դատավճիռ է կայացվել նաև Պետական անվտանգության վարչության (ՊԱՎ) նախկին պետի տեղակալ՝ Ուկրաինայի նախագահի անվտանգության ծառայության ղեկավար Կոնստանտին Կոբզարի նկատմամբ։ Նա դատապարտվել է 10 տարվա ազատազրկման՝ «անձանց անօրինական տեղափոխումը պետական սահմանով կազմակերպելու և դասալքություն կատարելու համար»։
«Մեղադրողները դատարանում ապացուցեցին, որ 2014 թվականի փետրվարի 23-ին Ուկրաինայի նախկին նախագահը, գործելով նախագահական անվտանգության ծառայության նախկին ղեկավարի և Ռուսաստանի ներկայացուցիչների հետ համաձայնության գալով, անօրինական կերպով օդային ճանապարհով հատել է Ուկրաինայի պետական սահմանը և կազմակերպել իր մերձավոր շրջապատից առնվազն 20 մարդու և Պետական անվտանգության ծառայության զինվորական անձնակազմի տեղափոխումը», - ասվում է հայտարարության մեջ։
Մեղադրանքի կողմի պնդմամբ՝ նրանք սկզբում թռել են Եյսկ, ապա՝ Անապա և Ղրիմ, որտեղից Յանուկովիչին հետագայում տարել են ծովով։ «Արդյունքում, պետական անվտանգության աշխատակիցների մի մասը Սևաստոպոլից մեկնեց Ռուսաստան նախկին նախագահի հետ միասին։ Նրանք այլևս չվերադարձան զինվորական ծառայության», - նշել է գլխավոր դատախազությունը։
Յանուկովիչն Ուկրաինայի նախագահի պաշտոնը զբաղեցրել է 2010-ից 2014 թվականներին։ 2014 թվականի փետրվարին տեղի ունեցած անկարգությունների (Եվրամայդան) ֆոնին նա համաձայնության է եկել ընդդիմության առաջնորդների հետ՝ արտահերթ նախագահական ընտրություններ անցկացնելու և սահմանադրական բարեփոխումներ իրականացնելու վերաբերյալ։ Համաձայնագրի կնքումից հետո Յանուկովիչը փաստացի հեռացվել է իշխանությունից ու տեղափոխվել Ռուսաստան։ Ավելի ուշ Ռադան նրան զրկել է Ուկրաինայի նախագահի կոչումից։
