Մայիսի 25-26-ի առատ տեղումների հետևանքով Լոռու և Տավուշի մարզերում արտակարգ իրավիճակ է առաջացել․ Դեբեդում այդ օրը ջրի մակարդակը հասել է վայրկյանում մինչև  650 խմ։ Այդ թիվն այսօր, օրինակ, 102 խմ է։ Այդ մասին այսօր Կառավարության նիստի ժամանակ հայտարարեց ՏԿԵ նախարար Գնել Սանոսյանը։

Նրա խոսքով՝ վեց անգամ և ավելի շատ ջուր է եղել այդ օրերին Դեբեդում, ինչի հետևանքով է առաջացել այս աղետալի վիճակը։

«456 փրկարար տարհանել են 443 մարդկանց։ Հիմա միայն Սանահինում 141 հոգի մնացել է գետի այն ափին, բայց փրկարար պարաններով նրանց ամեն ինչ հասցնում ենք։ Այս ամենի հետևանքով չորս զոհ ունենք»,- ներկայացրեց Սանոսյանը։

ՏԿԵ նախարարը տեղեկացրեց նաև, որ երկաթուղին վերականգնելու համար բավականին երկար ժամանակ կպահանջվի։

«Մ4 ճանապարհն ունի  տասը վնասված հատված, որոնցից հինգը՝ խոշոր։ Մ6 ճանապարհը 43 հատվածով է վնասվել։ Հինգ հատվածներում ճանապարհից ոչինչ չկա»,- ասաց Սանոսյանը։

Նա ներկայացրեց նաև, որ Բագրատաշենի անցակետը աղետի հետևանքով մեկ օր չի աշխատել։

Մանրամասները՝ տեսանյութում։