Առանց ԱՄՆ-ի, ԵՄ երկրները պետք է կարողանան մոբիլիզացնել մոտ 300,000 զինվորական՝ իրենց անվտանգությունն ապահովելու համար։
Պաշտպանության լրացուցիչ ծախսերը կկազմեն տարեկան մոտավորապես 250 միլիարդ եվրո: Այս մասին ասվում է Կիլում գործող Համաշխարհային տնտեսագիտության ինստիտուտի (IfW) զեկույցում։ Այն իր հետազոտությունն անցկացրել է բրյուսելյան խորհրդատվական Bruegel ընկերության հետ համագործակցությամբ։
Եթե ԱՄՆ-ը դադարեցնի պաշտպանական հարցերում աջակցել եվրոպացիներին, ապա ԵՄ-ն ստիպված կլինի ստեղծել լրացուցիչ 50 բրիգադ, գնել առնվազն 1400 նոր տանկ և 2000 զրահափոխադրիչ։ Սա ավելին է, քան Գերմանիայի, Մեծ Բրիտանիայի, Իտալիայի և Ֆրանսիայի ցամաքային զորքերի ներկայիս պաշարները միասին վերցրած։ Բացի այդ, ԵՄ-ն ստիպված կլինի տարեկան արտադրել մոտ 2000 երկարաթռիչք դրոն։
Զենքի գնումների և նոր ստորաբաժանումների ստեղծման ֆինանսավորման համար ԵՄ երկրները պետք է հասցնեն պաշտպանական ծախսերը տարեկան ՀՆԱ-ի 3,5-4%-ին: Այս դեպքում Գերմանիայի ռազմական բյուջեն ներկայիս 80 մլրդ եվրոյից կհասցվի 140 մլրդ եվրոյի, ինչը կհամապատասխանի ՀՆԱ-ի 3,5%-ին։
Եվրոպացիների համար գլխավոր խնդիրը մնում է ռազմական համակարգումը։ Թեև ԱՄՆ զինված ուժերը միասնական միավոր են, ԵՄ բանակների վերահսկումը հիմնականում մնում է ազգային պետությունների պատասխանատվությունը: