Արցախի Հանրապետության պաշտպանության նախկին նախարար-Պաշտպանության բանակի նախկին հրամանատար, Արցախի Հանրապետության նախագահի գործող գլխավոր խորհրդական Միքայել Արզումանյանի բերման ենթարկելու մասին նախագահ Հարությունյանը տեղեկացված չի եղել, գեներալ Արզումանյանին նախագահը համարում է մեր լավագույն զորահրամանատարներից մեկը։ Այս մասին MediaHub.am-ի հետ զրույցում ասաց Արցախի նախագահի մամուլի խոսնակ Լուսինե Ավանեսյանը։
«Միքայել Արզումանյանն ունի անցած փառավոր ճանապարհ: Անուրանալի են նրա գործադրած ջանքերը նաև 2020թ.-ի պատերազմի ժամանակ: Ճիշտ է՝ բանակի հրամանատարությունը նա ստանձնել է պատերազմի ավարտից ընդամենը 12 օր առաջ, բայց գործադրել է մեծածավալ ջանքեր ռազմական գործողությունների արդյունավետ վարման ուղղությամբ»,-ասաց նա։
Լուսինե Ավանեսյանը հույս հայտնեց, որ բերման ենթարկելու հանգամանքները շուտափույթ կերպով կպարզվեն:
«Գեներալ Արզումանյանի բերման ենթարկելու հետ կապված իրավիճակի զարգացումները գտնվում են նախագահ Հարությունյանի ուշադրության կենտրոնում»,-եզրափակեց նա։
Հիշեցնենք, որ այսօր Երևան գալու ճանապարհին բերման է ենթարկվել Արցախի նախկին ՊԲ հրամանատար Միքայել Արզումանյանը։ Նրան մեղադրանք է առաջադրվել ծառայողական պարտականությունների նկատմամբ անփույթ վերաբերմունք դրսեւորելու մասով , որն անզգուշությամբ առաջացրել է ծանր հետեւանքներ։
Անի Գևորգյան