Դանիան Բալթիկ ծովում ծովային հողմաէլեկտրակայանների նախատեսված հզորությունը 3 գիգավատի կհասցնի եւ կմիացնի դրանք գերմանական ցանցին՝ նպատակ ունենալով ազատել Եվրոպան կախվածությունից  ռուսական գազից: 2030-ին ստեղծվելուց հետո այն կկարողանա մինչեւ 4.5 միլիոն եվրոպական տուն ապահովել էլեկտրաէներգիայով, գրում է AP-ն։

470 կիլոմետրանոց ստորջրյա մալուխը կանցնի Դանիայի Բալթիկ ծովի Բորնհոլմ կղզու միջով դեպի հյուսիսային Գերմանիա, ինչը թույլ կտա էլեկտրաէներգիան ուղղակիորեն գերմանական էլեկտրացանց ուղարկել եւ ապա՝ Եվրոպա:

Այս պահին Դանիայում եւ Գերմանիայում ծովային հողմաէլեկտրակայանների հզորությունները 1.5 գիգավատ եւ 1 գիգավատ են կազմում: Գերմանիայի էկոնոմիկայի եւ կլիմայի նախարար Ռոբերտ Հաբեկն այդ նախագիծն «առաջնակարգ նախագիծ» է անվանել եւ հավելել է, որ «Եվրոպական գործընկերների նման նախագծերի շնորհիվ մենք միաժամանակ հասնում ենք երկու հիմնական նպատակի՝ եվրոպական էներգետիկ անվտանգության եւ կլիմայական չեզոքության»։ Գործարքի մասին հայտարարվել է երկուշաբթի Կոպենհագենում։

Դանիայի էներգետիկայի նախարար Դան Յորգենսենը հավելել է, որ «առավել քան երբեւէ միջազգային համագործակցություն է անհրաժեշտ ջերմոցային գազերի արտանետումների հետագա կրճատման եւ ռուսական գազից եւ նավթից Եվրոպայի անկախությունն ապահովելու համար»:

Ուրբաթ Գերմանիայի արտաքին գործերի նախարար Աննալենա Բերբոկը հայտարարել էր, որ, ըստ գնահատականների, Բալթիկ ծովի քամին կարող է «ավելի քան երկու անգամ ավելի շատ էներգիա, քան Գերմանիայի բոլոր ածխով աշխատող էլեկտրակայանները»:

«Բալթիկ ծովի շրջակայքի երկրները պետք է միասին աշխատեն եւ ուղի նախանշեն՝ մեր տարածաշրջանը ավելի դիմացկուն եւ անվտանգ դարձնելու համար»,- ասել է Բերբոքը:

Գերմանիայի կանցլեր Օլաֆ Շոլցն ասել է, որ Գերմանիան հավատարիմ է մնում մինչեւ 2045 թ. ջերմոցային գազերի արտանետումներն աստիճանաբար վերացնելու նպատակին, որը ամենավաղն է ցանկացած խոշոր արդյունաբերական երկրից: Այդ նպատակին հասնելու համար նրա կառավարությունը հայտարարել է, որ կփակի ածխով աշխատող էլեկտրակայանները, որոնք վերակառուցվել են ուկրաինական հակամարտության պատճառով, կդադարեցնի ռուսական նավթի եւ ածուխի ներկրումն այս տարի եւ նպատակ է դնելու դադարեցնել ռուսական գազի օգտագործումը հաջորդ երկու տարի։

Հայտարարությունն արվել է երկուշաբթի՝ Կոպենհագենում հանդիպումից մեկ օր առաջ, որը կքննարկի «Բալթիկ ծովի տարածաշրջանը ռուսական էներգիայից ազատելու եւ միեւնույն ժամանակ ճանապարհ հարթելու զգալի կանաչ անցման ուղիները», ասվում է Դանիայի կառավարության հայտարարության մեջ:

Նախատեսվում է, որ հանդիպմանը կմասնակցեն Եվրամիության գործադիր հանձնաժողովի նախագահը, Լիտվայի նախագահը, Լեհաստանի, Լատվիայի, Էստոնիայի, Ֆինլանդիայի եւ Դանիայի վարչապետները, ինչպես նաեւ էներգետիկայի մի քանի նախարարներ։