Բոյկոտում էին նիստերը, տանում նոր ընտրության․ Գեւորգյանը՝ Անիի նոր ընտրությունների մասին
Շիրակի մարզի Անի խոշորացված համայնքում ընտրություններից հետո ստեղծված ճգնաժամը այդպես էլ չհանգուցալուծվեց։ Գարնանը Անիում տեղի կունենան արտահերթ նոր ընտրություններ։ Խոշորացված համայնքը 4 ամիս առաջ անցավ ընտրական թոհուբոհի միջով, բայց մրցապայքարի ելած ուժերը ստացած քվեներով կոնսոլիդացիայի ամիսներ անց այդպես էլ չեկան։ Ընտրություններին մասնակցում են երեք քաղաքական ուժեր՝ «Քաղաքացիական պայմանագիր» կուսակցությունը, ամենաշատ քվե ստացած «Ազգ-համայնք» դաշինքը, եւ «Հայկական երազանք» կուսակցությունը։ Մասնակցող ուժերից որեւէ մեկը չհավաքեց 50+ տոկոս ձայն:

Համայնքի ղեկավար ընտրելու համար տեղի ունեցած ավագանու նիստերը ամեն անգամ տապալվելուց հետո կառավարությունըվորոշեց դադարեցնել ավագանու լիազորությունները եւ արտահերթ ընտրություններ նշանակել։ Նիստերը չէին կայանում «Քաղաքացիական պայմանագիր» ու «Հայկական երազանք» դաշինքի բոյկոտի պատճառով, ընդ որում, սա արվում էր՝ արտահերթ անցկացնելու նպատակով։

Ընդրություններին ամենաշատ ձայները ստացած «Ազգ-համայնք» դաշինքը գլխավորած Արտակ Գեւորգյանը MediaHub-ի հետ զրույցում ասաց, որ «Քաղաքացիական պայմանագիրն» ու «Հայկական երազանքը» այնպես արեցին, որ իրավիճակը տանի դեպի նոր ընտրություններ։

«ՏԻՄ օրենքը բավականին բարդ եւ ճկուն է գրված, օրենքում խնդիր կա։ «Ազգ-համայնք» դաշինքը հաղթել է, որի համար ես շնորհակալություն եմ հայտնում մեր ժողովրդին՝ վստահված քվեի համար։ Մենք մասնակցել ենք նիստերին, որպեսզի համայնքը նման վիճակում չհայտնվի։ Մենք դեմ չէինք, որ թեկուզ մյուս ուժերից ղեկավար ընտրվեր, բայց չեկան, ավագանու նիստերին չմասնակցեցին՝ բոյկոտեցին։ Եթե դաշինք կազմեին՝ 11 մանդատ կլիներ իրենցը, 10 մանդատ մերը ու հետաքրքիր աշխատանք կստացվեր։ Իրենք այնպես արեցին, որ հարցը գնա դեպի նոր ընտրություններ»,-ասաց Գեւորգյանը։

Հարցին՝ մասնակցելու՞ է արտահերթ ընտրություններին, որպես Անի համայնքի ղեկավարի թեկնածու, ուղիղ չպատասխանեց, միայն ասաց․

«Եղել եմ, կամ եւ շարունակելու եմ լինել իմ ժողովրդի կողքին»։

Կառավարությունն այսօրվա նիստում որոշեց վաղաժամկետ դադարեցնել Անի խոշորացված համայնքի ավագանու լիազորությունները։

"Հայաստանի Հանրապետության կենտրոնական ընտրական հանձնաժողովը սույն որոշումն ուժի մեջ մտնելուց հետո՝ մեկշաբաթյա ժամկետում, կնշանակի Հայաստանի Հանրապետության Շիրակի մարզի Անի համայնքի ավագանու ընտրության անցկացման օրը»,- նշված էր ՏԿԵ նախարարության նախագծում:

«Հայաստանի Հանրապետության Շիրակի մարզի Անի համայնքում կնշանակվեն ավագանու արտահերթ ընտրություններ՝ «Հայաստանի Հանրապետության ընտրական օրենսգիրք» Հայաստանի Հանրապետության սահմանադրական օրենքով սահմանված՝ տեղական ինքնակառավարման մարմինների հերթական ընտրությունների անցկացման կարգով:

Հիշեցնենք, որ Շիրակի մարզի Անի խողոշացված համայնքի սեպտեմբերի 25-ին կայացած ընտրություններին մասնակցում էր երեք ուժ՝ «Ազգ-համայնք» դաշինքը, որը ստացել էր 3763 ձայն, «Քաղաքացիական պայմանագիր» կուսակցությունը, որին վստահեց 3032 ընտրող եւ 1037 ձայն ստացած «Հայկական երազանք» կուսակցությունը։

Լիա Սարգսյան