ՀՀԿ փոխնախագահ Արմեն Աշոտյանի փաստաբան Տիգրան Աթանեսյանը երեկվա ասուլիսի ժամանակ հայտնել է, որ կալանավորված Արմեն Աշոտյանին զրկել են ընտանիքի անդամների՝ երեխաների հետ շփվելու հնարավորությունից:
Որպես կանոն, իշխանությունները նման ավտորիտար մեթոդների գնում են, երբ անազատության մեջ է հայտնվում իրենց քաղաքական հակառակորդը:
Նույն տրամաբանությամբ՝ իշխանությանն անհաճո գործիչների գործերը մակագրվում են այնպիսի դատավորների, որոնք «պորտալարով» կապված են «վերևների» հետ: Երեկ Աշոտյանի վերաքննիչ բողոքը մերժել է ՔԿ նախագահ Արգիշի Քյարամյանի սանիկը:
Այս երկու հանգամանքները բավարար են, որպեսզի Արմեն Աշոտյանին քաղկալանավոր համարենք: Նա, թերևս, նախկին համակարգի այն եզակի գործիչներից մեկն է, ում անունը կապվում է բացառապես քաղաքականության հետ:
Իշխանության ներկայացուցիչների բազմաթիվ հղումները քրեական գործին՝ քողածածկույթ են: Ստալինի ժամանակ էլ ռեժիմի հակառակորդներին ֆորմալ առումով դատում էին կոնկրետ քրեական գործերով, բայց բոլորը հասկանում էին, որ գործել է խոտոր բանաձև՝ մարդ լինի, հոդված միշտ էլ կգտնվի:
Հիմա հենց այս դասական բանաձն է գործել: Թիրախում եղել է Արմեն Աշոտյանը, հետո փորփրել են ու գործը «թխել» են:
Աշոտյանի գործը լակմուսի թուղթ էր, որ բացեց նաև հազարավոր մարդկանց աչքեր, ովքեր, մեղմ ասած, գործող իշխանության ընդդիմախոսները չէին կամ առնվազն այսօրվա ինստիտուցիոնալ ընդդիմության կողմնակիցները չէին:
Նիկոլական ժողովրդավարությունն իսկապես «աննախադեպ» է:
Վահրամ Բագրատյան