Սեպտեմբերի 25-ին Արցախում տեղի ունեցավ մե] ողբերգություն՝ պայթյուն բենզինի պահեստում, որի հետևանքով ունեցանք հարյուրավոր զոհեր, վիրավորներ ու անհետ կորածներ։ Հայությունը շոկի մեջ էր Արցախին պատուհասած ճակատագրից, երբ այն հանձնվեց թշնամուն և երբ Ստեփանակերտ-Ասկերան ավտոճանապարհի հարակից տարածքում`բենզինի պահեստում տեղի ունեցած պայթյունի հետևանքով 220 մահվան դեպք գրանցվեց, վիրավորների թիվն էլ անցնում է 200-ը։
MediaHub-ը զրուցեց Արցախի Հանրապետության առողջապահության նախարար Վարդան Թադևոսյանի հետ՝ հասկանալու, թե ի՞նչ վիճակում են պայթյունի հետևանքով վիրավորում ստացած անձինք, բուժման ո՞ր փուլում են գտնվում։
Պարզվեց, որ դեռ տասնյակ մեր հայրենակիցներ շարունակում են բուժումը.
«Այրվածքաբանության կենտրոնում դեռ բուժում է ստանում Արցախի Հանրապետության 50 քաղաքացի»,-նշեց նա։
Ըստ Թադևոսյանի՝ պացիենտներին տրամադրվող բուժօգնությունն անվճար է ՝ պետական պատվերի շրջանակներում։ Կային նաև պացիենտներ, ովքեր ծայրահեղ վիճակում էին ու իրենց բուժումը ստացել են արտերկրում․
«Արդեն ունենք մեկ հոգի, ով վերադարձել է Իտալիայից՝ ավարտելով իր բուժումը: Ես ինքս անձամբ եմ հետևում այդ գործընթացին, մենք ու մեր թիմակիցները հետևում ենք նրանց առողջացմանը»,- հավաստիացրեց առողջապահության նախարարը։
Նշենք, որ ողբերգության հետևանքով կային նաև 50 -ից ավելի անհետ կորածներ:
Վիկա Աբգարյան