ՀՀ պաշտպանության նախարարությունը մշակել է տարածքային պաշտպանության և տեղական պաշտպանության մասին նոր հայեցակարգ: ՀՀ պաշտպանության նախարար Սուրեն Պապիկյանն ԱԺ-ում խոսել է նոր հայեցակարգի մասին՝ նշելով, որ աշխարհազորի մասին օրենքն այսօր գործում է, բայց նոր հայեցակարգին համապատասխան նոր իրավական ակտեր, պետք է քննարկվեն ԱԺ-ում
Նախարարը բոլորի հանգստության համար նշել է, որ ՀՀ կառավարությունն ամեն ինչ անում է, որ պահեստազորը վարժական հավաքների միջոցով պատրաստվի, ինտեգրվի այն հատվածներին, որտեղ անհրաժեշտության դեպքում պետք է իրականացնի երկրի պաշտպանությունը:
«Եվ այս համատեքստում շատ կարևոր է նշել, որ մենք մեծ ուշադրություն ենք դարձնում մեր ողջ պահեստազորին, խոսքը վերաբերվում է ոչ միայն կցագրված անձնակազմին, այսինքն՝ այն քաղաքացիներին, որոնք զինվորական ծառայություն են անցել, այլ նաև մեր նոր պատրաստվածության մեջ ներգրավվելու է նաև Հայաստանի քաղաքացիների այն հատվածը, ովքեր ինչ-ինչ բերումով ազատվել են բանակից: Նրանց համար հնարավորություն կլինի պատրաստվել, տիրապետել զենքին և անհրաժեշտության դեպքում պիտանի լինել սեփական հայրենիքի պաշտպանությանը»,-ասաց նախարարը:
Նա նշել է, որ այսօր էլ ունենք համայնքներ, համայնքի բնակիչներ, ովքեր անհրաժշտության դեպքում իրենց մասնակցությունը կարող են ունենալ հայրենիքի պաշտպանությանը։