Գործողությունների համատեղ համապարփակ պլանի (միջուկային գործարք) կնքումը չի կանգնեցնի Իրանին միջուկային զենք ստեղծելու ճանապարհին: Այս մասին հայտարարել է Իսրայելի պաշտպանության նախարար Բենի Գանցն ԱՄՆ այցի ընթացքում՝ Վաշինգտոնում առաջատար վերլուծական կենտրոնների ղեկավարների հետ հանդիպմանը: Այս մասին հայտնում է RIA Novosti-ն՝ հղում անելով նախարարի մամուլի ծառայությանը:
«Իրանը ձեռք է բերել գիտելիքներ, ենթակառուցվածք և հնարավորություններ, և դա անշրջելի է: Դա թույլ կտա Իրնին ավելի ընդլայնել իր միջուկային ծրագիրը համաձայնագրի գործողության ընթացքում, որը կունենա ավելի քիչ սահմանափակումներ: Իրանը կարող է ստանալ միջուկային զենք, երբ նշված համաձայնագրի ժամկետը լրանա 2031 թվականին»,-ասել է Գանցը հանդիպմանը:
Գանցը նաև կարծիք է հայտնել, որ Ֆորդոյի կատարելագործված հարթակում Իրանը կարող է մի քանի շաբաթվա ընթացքում ուրանը հարստացնել մինչև 90 տոկոս: Նախարարի կարծիքով՝ Իրանն ունի հազարավոր կատարելագործված ցենտրիֆուգներ, որոնք թույլ կտան դա անել:
Գանցի խոսքով՝ ԱՄՆ-ի և Իսրայելլի միջև այդ թեմայով երկխոսությունը շարունակվում է: Իսրայելի պաշտպանության նախարարը նաև մեղադրել է Իրանին՝ մերձավորարևելյան տարածաշրջանում գործող ահաբեկչական խմբավորումներին ֆինանսավորելու մեջ: