Օգտատեր Զինա Գասյանը գրում է.
«Դիմում եմ որպես Արցախում բնակվող գիտակից մայր, Արցախի խնդիրներով ապրող քաղաքացի, կրթության ոլորտի ներկայացուցիչ (նաեւ դպրոցի ուսուցչուհի), պաշարման ծանր հետեւանքները կրող խոցելի խավի անդամ, պետական աշխատող:
… Առջեւում սեպտեմբերն է, խնդիրների ավելի «հուժկու» բանակ, որի դեմն առնելու համար «վահան» է պետք… Իրավիճակը սաստկանում է՝ ամեն հաջորդ օրը ավելի վատն է, քան նախորդը… Ինչեւէ…
ԱՀ ԿԳՄՍ նախարարություն պաշտոնական հայտարարություններից պարզ երեւում է, որ սեպտեմբերի 1-ից Արցախում գործելու են դպրոցները, մինչդեռ հասարակության բոլոր ներկայացուցիչները վաղուց է, ինչ նույնիսկ շաքարավազի (քաղցրավենիքի մասին լռում ենք համեստորեն), կաթնամթերքի կարիք ունեն, ինչը նշանակում է շատ պարզ եղելություն. աշակերտն, առանց նախաճաշելու կիլոմետրեր կտրելով, փորձելու է մի կերպ ոտքով հասնել ուսումնական հաստատություն… Ստացած գիտելիքը՝ 0...
Ինչո՞ւ քայլելով… Որովհետեւ ԱՀ տարածքային կառավարման և ենթակառուցվածքների նախարարություն պաշտոնական հայտարարություններից դեռ պարզ չէ՝ սեպտեմբերի 1-ից կգործի արդյո՞ք հասարակական տրանսպորտը…
ԱՐՑԱԽԷՆԵՐԳՈ-յի հայտարարություններից պարզ երեւում է, որ էլեկտրաէներգիան լավագույն դեպքում տրվելու է գրաֆիկով, ինչը նշանակում է՝ հեռավար կրթությունը բացառվում է…
ԱՀ սոցիալական զարգացման և միգրացիայի նախարարությունն էլ իր հերթին հետաքրքիր մարտավարություն ունի… Առաջնորդվում է. «Ով շուտ դիմում հանձնի կամ բազմազավակ է (լավագույն պարագայում խոցելի խումբ)» սկզբունքով… (Զարգացած աշխարհը վաղուց է անցել օնլայն ծրագրերի…)
Չեմ հասկանում մի պարզ ճշմարտություն. մյուս ընտանիքների երեխաները ինչո՞վ են «մեղավոր», որ բազմազավակ ընտանիքից չեն, ոչ էլ խոցելի խմբի անդամ… կամ ծնողները պետական աշխատողներ են եւ չեն կարող համապատասխան հիմնարկի մուտքի մոտ ժամերով հերթ կանգնել եւ դիմում լրացնել (կամ հանձնել՝ էական չէ…)
Մեր «հարեւանի» ջրաղացին ջուր չլցնելու համար օր առաջ է պետք խնդիրներին լուծում տալ… Երեխաների կրթական իրավուքը չպետք է խախտվի Արցախի Մարդու իրավունքների պաշտպան / Artsakh Ombudsman, տգետ հասարակությունը քաղաքակրթության չարիքն է…
Սերունդը չպիտի զրկվի իր իրավունքից…
Չէր խանգարի, եթե օր առաջ պետական համակարգը համագործակցի մասնավորի հետ…
… ԱՀ ԿԳՄՍ նախարարությունը համագործակցի ԱՀ Սոցիալական զարգացման նախարարության հետ, որոշեն մթերքների ցանկ (պարտադիր ներառված լինի շաքարավազ) եւ յուրաքանչյուր աշակերտի չափաբաժնով (ներառյալ ժամանակացույցը) տրամադրվի… Այսպես կխուսափենք նաեւ «մեկին հազար ձի ու ջորի» ասվածից եւ հավասարապես կպաշտպանենք մեր երեխաների իրավունքները…
Ուսուցիչների հարցը եւս շատ ակտուալ է…
ԱՀ տարածքային կառավարման եւ ենթակառուցվածքների եւ ԱՀ ԿԳՄՍ նախարարությունների համագործակցությամբ հնարավոր է լուծել քաղաքի ծայրամասերում բնակվող ուսուցիչների համապատասխան ուսումնական հաստատություն փոխադրելու խնդիրը՝ հստակ ունենալով նախապես գրանցած շահառուների ցանկ (առանց ծանոթներ ներառելու սկզբունքով առաջնորդվելով), գրաֆիկ, ժամանակացույց…
(Տեղյակ եմ վառելիքի սղության մասին, բայց դպրոցում մեր ապագայի «զենքն» է ուսանում…) Եթե խնայենք դպրոցների վրա, վաղը անկասկած բանտեր ենք կառուցելու… կամ էլ բանտերի պոտենցիալ ներկայացուցիչներ ենք մեծացնելու…
«Մենք ենք մեր սարերը» տարածքային զարգացման գործակալության, Արցախի անվտանգության և զարգացման ճակատ հանրային շարժման եւ ԱՀ ԿԳՄՍ նախարարության միջեւ ստեղծվի համագործակցություն «Սոցիալական ճաշարան» բարեգործական ծրագրի շրջանակում… Ծրագիրը իրականացվի դպրոցներում (մեկանգամյա սննդի ապահովման հարցը կլուծվի), զուգահեռ ծրագրի իրագործման համար օգտագործվեն դպրոցների ճաշարանները (բուֆետները)…
Վերոնշյալ գործընթացում անհրաժեշտ մթերքների ձեռքբերման հարցում դիտարկվի Արցախի Հանրապետության գյուղատնտեսության նախարարություն եւ Արցախի անվտանգության և զարգացման ճակատի համագործակցությունը…
Սննդամթերքը անհրաժեշտ կետեր հասցնելը կազմակերպվի ԱՀ Սոցիալական զարգացման եւ միգրացիայի նախարարության ունեցած տեղեկության համաձայն (շրջափակման արդյունքում գործազուրկ դարձած մեր հայրենակիցների՝ որպես աշխատողների միջոցով), տրամադրվի ամենամսյա աշխատավարձ, բայց ոչ տրամադրվող սոցիալական նպաստի չափով (մեծացնել աշխատելու շահագրգռվածությունը՝ խուսափելով մակաբուծությունից)։ Աշխատանքից հրաժարվողների նկատմամբ կիրառել որեւէ մեխանիզմ (որպես օրինակ. վերանայել գործազուրկներին տրամադրվող աջակցության չափը)…
Սննդամթերքի տեղափոխման մեջ ներառված (ոլորտում աշխատող) աշխատակիցների սանիտարական գրքույկների կազմակերպման հարցով զբաղվի Արցախի Հանրապետության Առողջապահության նախարարությունը…»:
MediaHub-ը փորձում է Արցախի ձայնը լսելի դարձնել աշխարհին, ցույց տալ մարդկային ճակատագրերն այս աղետալի օրերին: Աշխարհը լուռ է, բայց լուռ հետևել, թե ինչ է կատարվում հայկական երկրորդ պետությունում մենք չենք կարող....