Պապիկյանի բերած հիմնավորումները ԳՇ պետի մասով առնվազն անտրամաբանական էին․ Մանգասարյան
Խորհրդարանն այսօր արտահերթ նիստով ընդունեց կառավարության ներկայացրած օրենքի նախագիծը, ըստ որի՝ Հայաստանի Հանրապետության զինված ուժերի գլխավոր շտաբի պետը ի պաշտոնե կլինի պաշտպանության նախարարի առաջին տեղակալը:
Ի՞նչ ռիսկեր է պարունակում ընդունված նախագիծը։ Թեմայի շուրջ MediaHub.am-ը զրուցել է «Հենակետ» վերլուծական կենտրոնի փորձագետ Վիտալի Մանգասարյանի հետ։
Նրա խոսքով՝ պաշտպանության նախարարի բերած հիմնավորումները, թե ինչու է նման առաջարկ արվում, մեղմ ասած, լուրջ չեն։
«Սուրեն Պապիկյանը նշեց, որ խնդրահարույց է, երբ ՊՆ շենքում հանդիպում են տարբեր համազգեստով մարդիկ․ մի մասի կրծքին գրված է ԳՇ, մյուս մասինին՝ ՊՆ։ Դա, ըստ նախարարի, մեծ խնդիր է, և այս օրենքի նախագիծը բերելու համար լուրջ պատճառ»,- ասաց Մանգասարյանը։
Փորձագետը հիշեցրեց, որ համազգեստի հետ կապված փոփոխությունները տեղի են ունեցել հենց այս իշխանությունների օրոք։ Մանգասարյանը մեջբերեց ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի խոսքը, թե այդ համազգեստները նման են ձկնորսի համազգեստի։
«Այս հիմնավորումը, ինչպես նշեցի, անտրամաբանական է»,- նկատեց փորձագետը։
Վիտալի Մանգասարյանի դիտարկմամբ՝ հաջորդ հիմնավորումը, թե օրենքը պետք է ընդունվի նախքան ԳՇ պետի նշանակումը, ևս հասկանալի չէ։
«Մենք մոտ հինգ ամիս է՝ չունենք ոչ ԳՇ պետ, ոչ ռազմական հետախուզության պետ։ Տեսեք, երկրի թիվ մեկ զինվորական ծանր պաշտոն է ԳՇ պետի պաշտոնը և այն ենթադրում է մոտ հինգ ամիս ժամանակ, որ մարդը ծանոթանա նրբություններին, բոլոր գաղտնիքներին։ Ու եթե անգամ վաղը ունենանք ԳՇ պետ, մենք բացի անցած հինգ ամիսը, ևս հինգ ամիս ուշացած ենք լինելու»,- նկատեց փորձագետը։
Ըստ Մանգասարյանի՝ հատկապես անհասկանալի է այս ամենը, եթե հաշվի առնենք, որ իշխանությունն անընդհատ բարձրաձայնում է, որ Ադրբեջանը լեգիտիմ հիմքեր է ստեղծում նոր պատերազմ սկսելու համար։
«Այս տրամաբանության մեջ մենք ունենում ենք պաշտպանության ոլորտում հետ ընկած իրավիճակ»,- եզրափակեց խոսքը ռազմական փորձագետ Վիտալի Մանգասարյանը։
Նարե Գևորգյան
